سپورټ فوټبال

افغان فوټبال فدراسیون ته نوي اجرائیوي غړي وټاکل سول.

ليکنه: صابرحميدي

د پنجشنبې په ورځ افغانستان فوټبال فدراسیون کي د هیواد د فوټبال پرمختګ لپاره یوه ناسته ترسره سوه، چي د هیواد د ۳۱ ولایتونو څخه د فوټبال استازو ګډون کړی وو.

د یادي ناستي اصلي موخه دا وه تر څو په فوټبال فدراسیون کي اجرائيوي کمېټه بیرته فعاله او دې کمېټې ته نوي غړي وټاکي.

د افغانستان فوټبال فدراسیون لخوا په خپره سوې خبرپاڼه کي راغلي، چي د یادي ناستي څخه وروسته د ۳۱ ولایتونو څخه راغلو استازو اجرائيه کمېټې ته د غړو ټاکلو په موخه رایه اچونه ترسره کړه.

د یادي خبرپاڼي په حواله، چي د یادي رایي اچوني وروسته یادي کمېټې ته ۵ تنه ئې غړي او ۲ تنه د فوټبال سرپرست رئیس او معاون د فیفا یا د فوټبال نړیوال فدراسیون په استازولۍ د یادي کمېټې یو جز ټاکل سوي.

د ورکړل سوو معلوماتو له مخي، چي د یادي کمېټې ۵ تنه غړي نصیر احمد رحماني، امان الله فیضي، عبدالحق فیضي، رنګین خان دفتاڼی او آرزو رحیمي دي.

د افغانستان فوټبال فدراسیون سرپرست یوسف کارګر خوښي وښودله، چي اجرائيوي کمېټې ته نوي کسان ورپېژندل سول.

هغه زیاته کړه، چي یاده کمېټه به له دې وروسته د هیواد په ټولو ولایتونو کي د فوټبال لوبي او ټورنمنټونه څاري او د فوټبال په ډګر کي به هر ډول پرمختګونه، ننګوني او ستونزي څېړي او په وړاندي به ئې پرېکړي کوي.

د یادي کمېټې د رایي اچوني په مراسمو کي د افغانستان د ألمپيک ملې کمېټې او بدني روزني عمومي رئيس حفیظ الله ولي رحیمي هم ګډون کړی وو.

هغه په یادو مراسمو کي وویل، دا د خوښۍ ځای دئ، چي یوه ښځه ارزو رحیمي په اجرائيوي کمېټه کي د غړي په توګه ټاکل کیږي.

دا په داسي حاله کي ده، چي په وروستیو دوه کلنو کي د افغانستان فوټبال فدراسیون ته د ټاکنو نه ترسره کېدل په افغانستان کي د فوټبال پر ملي ټیم، د کور دننه سیالیو باندي ډېر منفي تاثیر کړی.

په افغانستان کي د فوټبال مینوال له فیفا څخه د نوي رئیس لپاره د ټاکنو غوښتنه کوي.

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړې پر دې سربیره د کندهار ولایت د ښوونې او روزنې د پوهنتون د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.