Advertisements
سپورټ نړیوال کرکټ

آسټرالیا په ټیسټ لوبه کي پاکستان ته سخته ماته ورکړه.

ليکنه: صابرحميدي

د آسټرالیا او پاکستان کرکیټ ملي لوبډلو ترمنځ د دوو ټیسټ سیالیو د لړۍ څخه ئې په لومړۍ لوبه کي آسټرالیا ـ پاکستان ته په یوه پاڼۍ او ۵ منډو توپير سخته ماته ورکړه.

یاده لوبه چي تېره پنجشنبه پيل سوې وه پکښي لومړی پاکستان توپوهنه پیل کړه. پاکستان د ټولو لوبغاړو په سوځېدو سره په خپله لومړۍ پاڼۍ کي ۲۴۰ منډي جوړي کړي.

د پاکستان لپاره په یاده لومړۍ پاڼۍ کي ۷۶ منډي اسد شفیق، ۳۷ منډي محمد رضوان، ۳۷ منډي اظهر علي او ۲۷ منډي بیا یاسر شاه جوړي کړې.

میچل سټارک ۴، پاټ کومینز ۳، جوش هزلوډ ۲ او نتن لاین بیا ۱ لوبغاړی د پاکستان دا په لومړۍ پاڼۍ کي وسوځول.

کله چي د آسټرالیا کرکیټ ملي لوبډله توپوهني ته په لومړۍ پاڼۍ کي میدان ته کښته سوه د ټولو لوبغاړو په سوځېدو سره ئې ۵۸۰ منډي جوړي کړې.

د آسټرالیا لپاره لابوس چینج ۱۸۵، ډیویډ وارنر ۱۵۴، جا بورنس ۹۷، میس وېډ ۶۰ او هیډ بیا ۲۴ منډي جوړي کړې.

یاسر شاه ۴، شهین شاه افریدي او هاریس سوهېل دوه دوه، خو عمران خان او نعیم خان بیا د آسټرالیا یو ـ یو لوبغاړی وسوځاوه.

کله چي پاکستانۍ لوبډلي دوهمه نیمه پایلوبه پيل کړه، دا ځلي ئې د ټولو لوبغاړو په سوځېدو سره ۳۳۵ منډي جوړي کړې. دا هیواد ونه توانېد، چي د آسټرالیا له لوري ورکړل سوی هدف پوره کړي او په دې سره ئې په یوه پاڼۍ او ۵ منډو توپير په لومړۍ ټیسټ لوبه کي د آسټرالیا څخه ماته وخوړه.

دا ځلي د پاکستان لپاره ۱۰۴ منډي بابر اعظم، ۹۵ منډي محمد رضوان، ۴۲ منډي محمد مسعود او ۴۲ منډي بیا یاسر شاه جوړي کړې.

په دوهمه پاڼۍ کي د پاکستان ۴ لوبغاړي جوش هزلوډ، ۳ لوبغاړي میچل سټارک، ۲ لوبغاړي پات کومینز او یو لوبغاړی بیا نتن لاین وسوځاوه.

د یادولو وړ ده، چي د آسټرالیا او پاکستان کرکیټ ملي لوبډلو ترمنځ دوهمه ټیسټ لوبه د رواني نومبر میاشتي په ۲۹مه نېټه پیلیږي او د راتلونکي ډیسمبر میاشتي تر ۳یمي نېټې پوري به دوام وکړي.

Advertisements

د لیکوال/ لیکوالې په اړه

محمد صابر حمیدي ، کندهار کې د یاران د کاري ټیم غړی

محمد صابر حمیدي په کندهار کې د یاران د کاري ټیم غړی دی. نوموړی پر دې سربیره د کندهار پوهنتون د ښووني او روزنې پوهنځی د پښتو څانګې د څلورم کال محصل دی او د ” زما“ راډیو خبري برخه کې کار کوي. صابر د فوټبال لوبغاړی دی. یاران ته په سپورټي، ټولنیزو او نورو برخو کې لیکنې او مطالب چمتو کوي. په یاران کې د نوموړي د ټولو لیکنو د بیا خپرولو حق له یاران سره خوندي دی.