سیاست له نړۍ

د یمن د مظلومیت سمبوله نجلۍ مړه شوه

لیکنه: بشر درویش

امل حسین هغه یمني نجلۍ چې د یمني ماشومانو د فقر او مظلومیت سمبول ګڼل کیده، د خوارځواکۍ له وجې مړه شوه.

دا څوک وه؟

امل حسین ۷ کلنۍ نجلۍ وه. د هغې د خوارځواکۍ ځپلي وجود تصویرونو هغه د یمن د فقر او مظلومیت په سمبول بدله کړې وه.

نوموړې د نومبر په لومړۍ نېټه له دې نړۍ سترګې پټې کړې.

نیویارک ټایمز ورځپاڼې د هغې له مرګه څو ورځې مخکې(د اکتوبر په ۲۶ مه) د نوموړې څو عکسونو ته خپل لومړی مخ ځانګړی کړی و.

د کورنۍ خبرې یې

د امل کورنۍ د خپلې لور د مړینې خبر تایید کړی.

د امل مور ویلي، چې لور یې پلازمېنې صنعا ته نیږدې د کډوالو په یوه پنډغالي کې له ژوند سره مخه ښه کړې ده.

د امل مور مریم علي ویلي: ( د هغې مرګ مې زړه مات کړی، هفه به تل خندانه وه، اوس مې نورو ماشومانو ته اندیښمنه یم).

د نیویارک ټایمز راپور

نیویارک ټایمز ورځپاڼې د امل حسین د مرګ خبر له دې سرلیک سره خپور کړی:( هغه نجلۍ چې د نړۍ پام یې د یمنیانو لوږې ته واړوه مړه شوه).

د نیویارک ټایمز خبریال له امل سره د خپلې لومړنۍ لیدنې په اړه لیکلي وو: « ایمل مې یمن ته د سفر پر مهال د صنعا ښار په ۹۰ کیلومټرۍ کې ولیده. هغه د کډوالو یوه روغتیایي مرکز ته د درملنې لپاره راوړل شوې وه. دا خوارځواکۍ ځپلې چې هرڅومره شیدې ورکول کیدې، بیرته یې را ګرځولې او اسهالیده…»

د نورو یمنیانو حال

د برتانیې یو خیریه سازمان چې د یمن په اړه یې څېړنې او له ماشومانو سره یې د مرستو کمپاینونه کړي، وایي ۵ میلیونه یمنیان د امل په شان له لوږې رنځیږي.

د ملګرو ملتونو د ماشومانو صندوق د منځني ختیځ مدیر وایي:( په هرو ۱۰ دقیقو کې یو یمني ماشوم مړ کیږي).

هېرشوی ناورین

د یمن جګړه تر څو میاشتې مخکې پورې د یو شمېر اروپایي او امریکایي هېوادونو لپاره هېرشوی ناورین و.

د یمن جګړه تر ډېره د ایران او سعودي جګړه ده. ایران د یمن له شیعه مذهبو ملاتړ کوي او د خپل نفوذ قلمرو یې ګڼي.

خو سعودي د مذهبه حکومت په نسکورولو کې د ایران تر مرستې وروسته هلته د سني پلوو د حکومت جوړیدو هڅې کوي.

دا جګړه له څو کلونو راهیسې شدیده شوې، چې یو شمېر نور عربي او اسلامي هېوادونه هم پکې د سعودي ملاتړ کوي.

د سعودي د ملاتړ لړۍ د مکې معظمې پر لور د یمن د یاغي ډلو لخوا تر ناکامو توغندیزو بریدونو وروسته پیل شوه.

نړیوال غبرګونونه

امریکا متحده ایالات، فرانسه او برتانیه د یمن جګړې بېړنی پای غواړی.

د ملګرو ملتونو د ماشومانو د ملاتړ اداره وایي، چې د یمن جګړې له پیله تراوسه یوازې ۱۲۴۸ ماشومان د سعودي پلوو په بریدونو کې وژل شوي.

سربېره پردې میلیونونه کسان د جګړې له کبله په کوردننه او بهر کډوالۍ ته مجبور شوي، چې اوس په بده ورځ ژوند تېروي.

د لیکوال/ لیکوالې په اړه

بشر درویش

بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي