ژوند بڼه کورنی ژوند

پنځه کارونه چې د ښځې او خاوند تر منځ اړيکه لا قوي کوي.

لیکنه: ياران

ژباړه: عمران لمر

د ښځو او خاوندانو تر منځ اړيکې ډېر متفاوتې وي، ځينې ښځې او خاوندان سره ژوره اړيکه لري او ځينې هم يواځې له يو بل سره عمر تېروي.

د ژورې اړيکې لپاره بايد تاسو ميلان ولرئ او په پوره قوت او علاقې سره هڅه وکړئ؛ له هڅې پرته حتی قوي مينه هم بې رنګه کېږي. ارواپوهان عموماً د قوي اړيکې د رامنځته کولو لپاره مختلف نظرونه لري؛ ځینې احساساتي دي او په رښتينې مينې ټينګار کوي او ځينې بيا منطقي برخورد کوي. دوی په پنځو کارونو چې د ښځې او خاوند تر منځ ژوره اړيکه جوړوي؛ موافقه لري. شايد يو څه سخت ښکاره شي؛ مګر په ټوله کې ډېر ارزښتمن ګڼل کېږي.

۱- عزت او احترام
د دې لپاره چې ډاډه شئ چې په کومه اندازه د ژوند له ملګرې يا ملګري سره د خپلې اړيکې خيال ساتئ؛ ښه ده چې د کورنيو اړيکو مشاور ته ورشئ.
هغه مينې هم چې ډېر وخت يې کېږي، ساتنې ته اړتيا لري؛ همدارنګه په هر وخت کې چې تاسې د مقابل لوري خيال ساتئ؛ په دې مانا چې هغه ته احترام کوئ او د هغه احساساتو چې ستاسې په اړوند يې لري؛ عزت کوئ.

۲- مثبته هڅونه
که يو له دواړو لوريو دا وکولای شي چې بل ته په مثبته هڅونه د سمې لارې لارښوونه وکړي؛ نو د ښځې او خاوند تر منځ به ژوره اړيکه رامنځته شي. په دې توګه ننګونې او ستونزې هوارېږي.
دا يو حياتي عادت دی؛ تر دې چې که يو چا سره د بلدتيا په مرحله کې هم يۍ، کولی شي له تاسې سره مرسته وکړي؛ تر څو په اړيکه کې وروستۍ مرحلې ته ورسېږئ.

۳- مهرباني
کله چې مونږ د مهربانۍ په هکله غږېږو؛ نو هدف مو د ښځې او خاوند تر منځ له جنسي اړيکو پورته يو څه وي.
د مهربانۍ په رامنځته کولو کې لومړی ګام دا دی چې په دې بايد وپوهېږئ چې د ژوند ملګرې يا ملګري ته مو څه اهميت لري. بايد پوه شئ چې د مقابل لوري څه خوښېږي؟ څه ډول خوشحالېږي؟ ژوره او قوي اړيکه هغې ته وايي چې هر وخت په کې مهرباني شتون ولري.

۴- جوړښت
که د ژورې اړيکې جوړول غواړئ؛ نو جوړښت ته مو د فهرست په لومړي سر کې ځای ورکړئ.
جوړښت په دې مانا دی چې وکولی شئ د ژوند مسايل مو په ګډه سنبال کړئ؛ پرته له دې چې په يو لوري فشار راشي.
په دې برخه کې د بريالي کېدو لپاره کولای شئ له کوچنيو مسايلو پيل وکړئ؛ د مثال په ډول: کله چې مېرمن د ماشوم پالنه کوي؛ سړی دې د کور په کارونو کې ورسره مرسته وکړي.

۵- اړيکې
له اړيکو پرته هر ډول اړيکه مړه ده، دا د ښځې او خاوند تر منځ د ژورې اړيکې ځانګړنه ګڼل کېږي.
د ټولو کارونو په هکله خبرې کول، د خبرو او د يو بل د څېرې د حالاتو درک کول؛ ټول د اړيکو په مجموعه کې حسابېږي.
که په دې هکله کمزوري يۍ؛ نو هڅه وکړئ چې د مطالعې له لارې او يا هم د تکنالوژۍ له لارې ورسره بلد شئ.
په دې ترتيب کولای شئ، په دې پوه شئ چې کوم څه مو د ژوند ملګرې يا ملګری خفه کوي او د دې لپاره ښه حل لاره موندلی شئ.
د مالي مسايلو، اړيکو او احساساتو شريکول کولای شي؛ تر منځ مو قوي او ژوره اړيکه رامنځته کړي.

د لیکوال/ لیکوالې په اړه

ياران