بریا او پرمختګ

د تشویش پرځای تمرکز او فکر وکړئ

ژباړه او زياتونه: محمد عزيز پردېس

موږ د خالي لاسونو سره دې نړۍ ته راغلي يوو او په خالي لاسونو سره له دې نړۍ ځو، نو د هغو څيزونو په اړه تشويش مه کوئ چې ستا ارامښت له تا څخه واخلي.

تشويش ستا سبانۍ ستونزه له منځه نشي وړلی، خو نننی ارامښت دې چورلټ له منځه وړي.
د سبا په اړه تشويش پرېږده…
ستا د پرون او نن خدای، د سبا خدای هم دی.
خوښي يانې، الله تعالی ته ځان سپارل، په الله تعالی توکل کول، قوي هوډ لرل او هڅه کول.

د څېړنو په اساس هغه کسان چې د خپلې راتلونکې په اړه ډېر تشويش کوي، د هغوی راتلونکی د هغوی د توقع خلاف رامنځ ته شوی.

تشويش يوازې ستاسو اوسنی حالت ګډوډوي او بس.

د هر کار سره جدي برخورد مه کوئ، دا د پخوانيو او پوهو کسانو تجربه ده او د متل په توګه دا قولونه موږ ته راپاتې دي: د روانو او مړو اوبو مخه هېڅ څوک نشي نيولی او نرمه غاړه شمشېر هم نشي پرې کولی.

که تاسو په دې اړه تشويش کوئ چې راتلونکی به مو څه ډول وي، نو اشتباه کوئ؛ د الله تعالی څخه پرته هېڅ څوک هم د راتلونکې په اړه مالومات نلري. غوره به دا وي چې يوازې د نن په کارونو ځير شئ، له پرون څخه تجربه واخلئ او د سبا لپاره هيله من واوسئ.

مخکې له دې چې يو کار يا عمل وکړئ، لومړی ښه فکر پرې وکړئ. د شمالي ولايتونو يو يو ولسي شاعر او ليکوال شهيد زين العابدين پردېس په دې هکله داسې ويلي و:

په هر کار کې عجله او ځغلېدل
د کارونه هرګز نه دي د عاقل
عاقلان ړومبی کوي د کار فکرونه
له اوبو نه مخکې نه باسي بوټونه

د لیکوال/ لیکوالې په اړه

محمد عزیز پردیس

محمد عزیز پردېس منځنۍ زده کړې د کندز په حضرت علي لېسه کې او لوړې زده کړې يې د کندز پوهنتون د ښوونې او روزنې پوهنځي په پښتو ځانګه کې کړي دي.
نوموړی دمګړی له يو خصوصي انستيتوت سره د ژباړې په برخه کې بوخت دی.
د ياران وېبسايټ څخه يې هر اړخيزې ليکنې او ژباړې لوستلی شئ.
په یاران کې د عزیز پردیس د خپرو شویو لیکنو د بیا خپراوي حق یوازې له یاران سره خوندي دی