بریا او پرمختګ ژوند بڼه

نهه لاملونه، چې تاسو خپلو هیلو ته رسوي

اعلان

ژباړه: عطا محمد میاخېل

د برایان ټریسي په فرد پورې منحصرې سپارښتنې وازمایئ، ترڅو په خپل کار او ژوند کې یې فوق العاده اغېزې ووینئ. برایان ټریسي د نړۍ یو له نوموتو ویناوالو، روزونکو او لیکوالانو څخه دی، چې ډېر هېوادونو ته یې سفر کړی دی او په بېلابېلو برخو کې د هغه ویناوې او سیمینارونه، لکه: فردي دوې او پراختیا، رهبري، د وخت مدیریت، کار و بار او پلور کې دي.

ټریسي د بریا لاملونه پېژندلي، چې له تاسو سره مرسته کوي، ترڅو هم په فردي ژوند کې او هم په خپل مسلکي ژوند کې، ډېرو زیاتو بریالیتوبونو ته ورسېږئ. که د دې سپارښتنو یوه برخه یا ټولې یې عملي کړئ، نو په سم تګلوري کې به مېشت شئ او ډېر ژر به خپلو غوښتنو ته ورسېږئ.

۱ ـــ زده کړو ته پام کول

څېړنې ښیي، د تر لاسه شوي معاش لوړه کچه په پوهو، مهارت لرونکو او د لوړو زده کړو لرونکو کسانو پورې تړاو لري. یو پوه او د لوړو زده کړو لرونکی کس، د خپلې کاري برخې په اړه بشپړ معلومات او سم لید لوری لري او له بهیر او بدلونونو څخه یې خبر دی؛ له دې امله زده کړې هغه موضوع ده، چې د ژوند په اوږدو کې باید په بشپړه توګه پام ورته وشي.

۲ ـــ د مهارت ترلاسه کول

د بریا یو له لاملونو څخه د مهارت لرل دي، هرڅومره، چې ډېر مهارتونه ولرئ، نو په خپله دنده کې به د ودې او پرمختګ لپاره ډېر زیات فرصتونه ولرئ. تاسو کولای شئ، د مطالعې یا د بېلابېلو تجربو د ترلاسه کولو له لارې، خپل مهارتونه زیات کړئ.

۳ ـــ د اړیکو پراختیا

د اړیکو د کړۍ پراختیا ډېره زیاته مهمه ده، دا کار وخت او ډېرې هڅې ته اړتیا لري او تاسو تل باید د خپلو اړیکو د کچې د ډېرښت په حال کې واوسئ، په دې صورت کې به له ډېرو کسانو سره آشنا شئ، چې هر یو به په خپل وار سره، د اړتیا په صورت کې ستاسو مرستې ته را ودانګي او له ودې او پرمختګ سره به مو مرسته وکړي.

۴ ـــ شتمن اوسېدل

د پیسو او شتمنۍ مدیریت ډېر مهم کار دی. که په کافي اندازه پیسې ولرئ، نو کولای شئ، چې په مخکې مو له شته فرصتونو څخه ښه او اغېزمنه ګټه واخلئ. د بېلګې په توګه: که له خپلې دندې څخه راضي نه یاست، خو ګټې ته یې اړتیا ولرئ، نو په ډېرې آسانۍ سره کولای شئ، چې خپل ځای او موقعیت ته بدلون ورکړئ، خو که چېرې امکانات او بېلابېلې ټاکنې په مخکې ولرئ، نو په دې صورت کې به وکولای شئ، په آزاده توګه کړنې ترسره کړئ.

۵ ـــ له ښو کاري عادتونو څخه برخمن اوسېدل

دا عادتونه د کارونو د مناسبې لومړیتوب بندۍ او فعال اوسېدلو په مانا دي او د ګټه اخیستنې کچه لوړوي. د پانګې پرمهال ستاسو وړتیا د بېرته را ګرځېدو د کچې د ډېرښت لپاره، تاسو ته دا شونتیا درکوي، ترڅو په کم وخت کې، ډېرې لاسته راوړنې ولرئ. منظم اوسېدل او په کارونو کې د دقت او ځیرکتیا لرل، د بریالیتوب سبب ګرځي.

۶ ـــ مثبت فکر کول

تاسو دا ځواک لرئ، هغه تګلوري ته په نه پام سره، چې پکې یاست، مثبت فکره واوسئ، باید هڅه وکړئ، چې په هر ډول شرایطو کې د پېښې مثبت اړخ ووینئ او مخ پر وړاندې لاړ شئ. یو مثبت ذهني لیدلوری به هم په کاري او هم شخصي ژوند کې ستاسو لپاره ډېر ګټور وي.

۷ ـــ د مناسب ظاهر لرل

د بریالیو انسانانو په څېر جامې واغوندئ، دا یو ستر حقیقت دی، چې د افرادو ظاهر د هغوی په ژوند باندې ډېره زیاته اغېزه لري او په افرادو باندې د هغوی د ظاهر پر بنسټ قضاوت کېږي. یوه له غوره لارو څخه، چې کولای شئ خپل ځان په ښه توګه نورو ته ښکاره کړئ، له خپل ځان څخه د یوه مثبت انځور را منځته کول دي؛ له دې امله ارزښت یې لري، چې د خپل وخت یوه برخه د خپل ظاهر منظمولو ته ځانګړې کړئ.

۸ ـــ د خلاقیت ډېرښت

خلاقیت په ژوند کې د بریا یو له مهمو لاملونو څخه دی او تر ټولو غوره لاره ده، چې په مرسته یې په شوني چټک وخت کې، خپلو موخو ته ورسېږئ. په یاد ولرئ، چې کله وخت یوازې د یوې نظریې لرل کولای شي، د شتمنۍ د رامنځته کېدو سبب شي. اوس یې تصور کړئ، چې په خپل سر کې فوق العاده نظریې لرئ او که نه.

۹ ـــ د یوه کلک او مینه ناک شخصیت له لرلو څخه برخمن اوسېدل

هغه درنښت، چې د نورو د اعتماد له امله را منځته کېږي، ستاسو د ژوند، کاري او شخصي اړیکو لپاره یو ځواکمن بنسټ دی. د شخصي انضباط مراعاتول او د رښتینولۍ لرل د دې سبب ګرځي، چې ستاسو پرمخ د ډېرو فرصتونو دروازه پرانیستل شي. کله چې نور تاسو یو رښتینی او امین شخص وګڼي، نو په تاسو باندې به ډېر اعتماد وکړي او وبه مو مني.

د لیکوال/ لیکوالې په اړه

عطا محمد میاخېل