سپورټ کورنی کرکټ نړیوال کرکټ

د سلمان خان ورور او عربینز لوبډلې خاوند: يوازې پر راشد خان حساب کوم !

لیکنه: مدثر دعوت

ليکنه: مدثر دعوت

د باليووډ سينما مشهور لوبغاړی، او په لس اووريز ليګ کې د مراټيا عربينز لوبډلي خاوند سوحيل خان وايي په خپلي لوبډلي کي تربل هر لوبغاړي پر راشدخان ډير حساب کوم.

سوحيل خان چي د سلمان خان ورور دی د يوې ځايي رسنۍ سره يې په مرکه کي ويلي چي دی د راشدخان لوبي هرکله تعقيبوي او سرسخت مينوال يې دی.

نوموړي راشدخان د نړۍ په سطحه يو غوره ځوان او پياوړی لوبغاړی ياد کړی او دخپلي لوبډلي لپاره يې دا وياړ بللی چي د نړۍ لومړی مقام الرونډر او لومړی مقام توپ اچوونکی ورسره په لوبډله کي ګډون کوي.

د لس اووريز کرکيټ ليګ دويم پړاو سيالۍ چي د رواني نومبر مياشتي په يوويشتمه نيټه د دوبۍ په شارجې کرکيټ لوبغالي کي پيل کيږي، ډير احتمال سته چي راشدخان به دخپلي لوبډلي لوبډلمشر وي.

د راشدخان سره دوه افغان لوبغاړي حضرت الله ځاځی او نجيب الله ځدران هم په لوبډله کي يوځای دي.

د سوحيل خان ترڅنګ ټول هندوان پر راشدخان مينان دي.

د ۲۰۱۸ز کال هندوستان پريمرليګ په دوران کي دهند ولس د راشدخان څخه دومره متأثره سو چي له خپل حکومته يې وغوښتل ترڅو راشد ته افتخاري تابعت ورکړي.

راشدخان د نړۍ يوله مشهورو او بې مثاله لوبغاړو څخه دی، چي د کرکيټ د نړيوالي شورا د شل اوريزو لوبو د توپ اچوونکو په درجه بندۍ کي لومړی،د يو ورځنيو لوبو د توپ اچوونکو په درجه بندۍ کي دويم او د الراونډرانو په درجه بندۍ کي لومړی مقام لري، چي محمدنبي ورسره په دويم مقام کي قرار لري.

په راتلونکي لس اووريز کرکيټ ليګ کي چي يوازي دګوتو په شمير ورځي ورته پاته دي د افغانستان ۱۲ لوبغاړي د نړۍ د نورو مشهورو او پياوړو لوبغاړو سره يوځای په کي برخه اخلي.

 

د لیکوال/ لیکوالې په اړه

مدثر دعوت

مدثر دعوت هلمند میشتی ژورنالیست دی. د یاران لپاره په سپورتي برخه کې لیکنې کوي. په یاران کې د ښاغلي مدثر د لیکنو د بیا خپراوی حق له یاران سره خوندي دی.