سپورټ کورنی کرکټ نړیوال کرکټ

د شهزاد ژوند، کرکټ ته راتګ او ریکارډونه یې

شهزاد محمدي په ۱۹۸۸ م کال کې د جنوري په ۳۱ مه نېټه د ننګرهار ولایت په کوټ ولسوالۍ کې زېږېدلی دی.

شهزاد محمدي اوسمهال شا او خوا ۳۰ کاله عمر لري.

نوموړی د افغان لوبډلې وېکټ ساتونکی ښي لاسی توپ وهونکی دی، شهزاد محمدي له بندیزونو پرته په ټولو لوبو کې د افغان لوبډلې ملګری پاتې شوی او په هره لوبه کې یې د افغانستان لپاره ځواکمن رول لرلی.

محمدي د یو ورځنیو لوبو سربېره په شل اوریزو لوبو کې د افغانستان لپاره بریدکوونکی توپ وهونکی دی.

هغه یو ځل د دوهمه درجه کرکټ هېوادونو په منځ کې د شل اوریزو لوبو د کال غوره لوبغاړی راغلی و، چې د کرکټ نړیوالې شورا بیا ورته جایزه هم ورکړې وه.

شهزاد د دوهمه درجه هېوادونو په منځ کې تر ټولو زیاتې منډې کړې وې، په تېر کې چې به افغان لوبډلې په توپ وهنه کې ډېره تکیه کوله، هغه به په شهزاد محمدي کېدله، اوپننګ برخه کې به شهزاد محمدي د لوبډلې د ملا تیر و.

په ۲۰۱۱ کال کې له ایرلېنډ سره شل اوریزې لوبې وې، دا لوبې په عربي متحده اماراتوکې روانې وې، شهزاد محمدي او کریم صادق اوپننګ ته راغلل، ایرلېنډ افغانستان ته ۱۴۵ منډې هدف ورکړی و، کریم صادق په ۱۷ توپونو ۳۲ منډې وکړې او شهزاد محمدي په ناسوځېدلې پنځوسیزې لوبډله تر بریا ورسوله.

۲۰۱۶ م کال او شهزاد محمدي
نوموړي د ۲۰۱۶ م کال د جنوري په ۱۰ مه نېټه د زِمبابوې خلاف ریکارډي لوبه وکړه، شهزاد محمدي په شل اوریزو لوبو کې ۱۱۸ منډې وکړې، چې د برېنډن مکالم منډو پسې دوهمې لوړې منډې وې.

دا مهال شهزاد په نړۍ کې شپږم مخکښ شل اوریزو لوبو توپ وهونکی و.

له دې وروسته شهزاد محمدي د کرکټ نړیوالې شورا په درجه بندۍ کې لسم توپ وهونکی و.

شهزاد محمدي لومړی وېکټ ساتونکی افغان لوبغاړی و، چې د هندوستان خلاف ټېسټ لوبه کې ولوبېد.

شهزاد محمدي د ۲۰۱۸ کال د اسیا جام یو ورځنیو سیالیوکې د شاهد افریدي ریکارډ سره ځان مساوي کړ.

افغان لوبډلې ټولې ۱۳۱ منډې کړې وې، چې شهزاد محمدي لا ولاړ و، هغه د هندوستان خلاف ۱۲۴ منډې وکړې او په اسیا جام سیالیو کې یې سلیزه ثبت کړه او په دې ډول یې شاهد افریدي سره ځان ریکارډ کې مساوي کړ.

ژوند او تېر وخت
د شهزاد محمدي اصلي ټاټوبی د افغانستان ختیځ د ننګرهار ولایت کوټ سیمه ده.

د شهزاد کورنۍ هم د شوروي اتحاد د یرغل پر مهال له افغانستان څخه پاکستان ته ولاړه او هلته یې د مهاجرت شپې ورځې سبا کولې.

شهزاد محمدي د پېښور په شېباغ کې اکاډومي کړې او همدارنګه د پښتونخوا په نورو کرکټ اکاډومیانو کې هم لوبېدلی دی.

شهزاد محمدي د ۲۰۱۸ کال څخه وړاندې له خپلې کورنۍ سره یو ځای پاکستان کې اوسېده؛ خو په ۲۰۱۸ م کال کې افغان کرکټ بورډ په افغان لوبغاړو جبري کړه، چې باید له باندنیو هېوادونو په ځانګړي ډول له پاکستان څخه خپل هېواد ته راستانه شي.

محمدي دې هم کډه راوړې او په کابل کې میشت دي.

شهزاد واده کړی او اولادونه هم لري.

نړیوال کرکټ
شهزاد محمدي په ۲۰۰۸ م کال کې د افغان لوبډلې برخه نه و، خو په ۲۰۰۹ م کال کې له افغان لوبډلې سره رسما یو ځای شو، ۲۰۰۹ کال کې په افریقا کې د کوالیفای یا غوراوي پړاو سیالیو کې شهزاد محمدي خورا ښه توپ وهنه وکړه.

په دغه ټورنمنټ کې د شهزاد محمدي د ښې کارکرده ګۍ له امله افغان لوبډلې وکولای شول، چې د یو ورځنیو لوبو درجه تر لاسه کړي، له دې وروسته په ۲۰۱۴ م کال کې افغان لوبډله په اسیا جام سیالیو کې ولوبېده.

اوسمهال افغان لوبډله په شل اوریزو، یو ورځنیو او ټېسټ لوبوکې د کرکټ شورا بشپړ غړې لوبډله ده.

فرسټ کلاس یا څلور ورځنۍ سیالۍ او شهزاد محمدي
شهزاد محمدي د ۲۰۰۹ کال څخه ۲۰۱۰ کال پورې په فرسټ کلاس سیالیو کې خورا ښه توپ وهونکی و.

د ۲۰۰۹ م کال په اګسټ میاشت کې شهزاد محمدي د زمِبابوې خلاف لومړۍ فرسټ کلاس لوبه وکړه او پیل یې د زِمبابوې خلاف وکړ.

هغه په لومړۍ پاڼۍ کې ۷۹ منډې وکړې، دا مهال افغان لوبډله بیخي ځوانه او د تجربې له نشتون سره مخ وه.

له دې وروسته شهزاد محمدي د ایرلېنډ خلاف فرسټ کلاس دوه لوبو کې ۸۸ او بله ۴۰ ناسوځېدلې منډې وکړې.

شهزاد محمدي د نورو لوبډلو پر وړاندې خپلې بې رحمه او توپاني توپ وهنې ته دوام ورکړ.

هغه په ۲۰۱۰ م کال کې په یوه څلور ورځنۍ لوبه کې د کاناډا خلاف په یو ځل دوه سلیزې ووهلې په یواځې ځان یې ۲۱۴ ناسوځېدلې منډې وکړې، چې فرسټ کلاس سیالیوکې یو نه هېرېدونکی ریکارډ دی.

افغان لوبډلې کاناډا ته په ۴۹۴ منډو ماته ورکړه.

شهزاد خپله توپ وهنه او سلیزو جوړول جاري وساتل، هغه په ۲۰۱۰ م کال کې د سکاټلېنډ خلاف سلیزه ووهله.

شهزاد محمدي په دغې لوبه کې ۹۴ منډې کړې وې، چې په مُنیب اقبال یې شپږیزه ووهله او خپله سلیزه یې پوره کړه.

شهزاد محمدي د دوهمه هېوادونو ترمنځ په نړیوال جام سیالیو کې د سکاټلېنډ خلاف په پای لوبه کې نیمه سلیزه جوړه کړه او افغان لوبډله چې د لومړي ځل لپاره دغه ته ورغلې وه اتلولي یې هم افغان لوبډلې واخېسته.

دا جام چې کله پای ته رسېده؛ نو شهزاد محمدي پکې ځان د ټول ټورنمنټ مخکښ توپ وهونکی ثابت کړ، هغه ۸۰۲ منډې وکړې او د ټول جام غوره توپ وهونکی شو.

په دغه جام کې هغه دوه سلیزې او پنځه پنځوسیزې ووهلې.

په دغه جام کې هغه ۲۵ کېچونه ونیول او ۳ یې سټمپ اوټونه هم وکړل.

شهزاد محمدي له ۲۰۱۱ کال څخه تر ۲۰۱۷ م کال پورې
محمدي په ۲۰۱۱ م کال کې د دوهمه درجه هېوادونو په نړیوال جام لومړۍ نیمه سلیزه د کاناډا خلاف ثبت کړه او د لوبو پیل یې په پنځوسیزې سره وکړ.

محمدي دا مهال د کرکټ ملي لوبډلې مرستیال لوبډلمشر وټاکل شو.

له دې وروسته شهزاد یو څه اوټ فوم شو، خو په ۲۰۱۵ م کال کې هغه یو ځل بیا په فرسټ کلاس کې د پاپوا نیوګیني او نمېبیا خلاف سلیزې ثبت کړې.

د پاپوا نیوګیني خلاف افغان لوبډلې به ۲۰۱ منډو بریا حاصله کړه.

د نمېبیا خلاف د شهزاد سلیزې افغان لوبډلې ته په یوه پاڼۍ د بریا چانس ورکړ په دغې لوبه کې محمدي د لوبې غوره لوبغاړی شو.

له دې وروسته افغان لوبډلې په ۲۰۱۸ م کال کې د ټېسټ لوبو بشپړ غړیتوب ترلاسه کړ.

۲۰۱۲ کال کې شهزاد د دوهمه درجه هېوادونو په توپ وهونکو کې مخکښ او مشهور توپ وهونکی و.

شهزاد په همدغه کال د کرکټ نړیوالې شورا په ۱۱ کسیزه لوبډله کې شامل کړای شو او د انګلستان خلاف یې په دوبۍ کې لوبه وکړه.

شهزاد محمدي، محمدنبي عیسی خېل او حمید حسن په ۱۲ کسیز سکواډ کې شامل وو، شهزاد د کرکټ نړیوالې شورا په ګټه ۲ نیمه سلیزې جوړې کړې.

که څه هم د دوی لوبډلې لوبه وبایلله، خو شهزاد د لوبې غوره لوبغاړی شو.

یوه تاریخي ټېسټ لوبه
د ۲۰۱۸ کال په می میاشت کې افغان کرکټ بورډ د هندوستان خلاف تاریخي ټېسټ لوبې لپاره لوبډله اعلان کړه، چې شهزاد محمدي هم پکې وجود درلود.

د شهزاد محمدي یو ورځنۍ لوبې
\شهزاد په ۲۰۰۹ م کال کې افریقا کې د نړیوال جام په کوالیفای سیالیوکې ولوبېد، د نمېبیا خلاف شهزاد ۷۳ منډې وکړې.
شهزاد د یو ورځنیو لوبو پیل په ۲۰۰۹ م کال کې د اګسټ په ۳۰ مه نېټه د نېدرلېنډ خلاف وکړ.

هغه لومړی افغان لوبغاړی و، چې د لومړي ځل لپاره یې په دوهمه لوبه کې سلیزه ثبت کړه، نوموړي ۱۱۰ منډې وکړې او افغان لوبډلې په ۶ وېکټو نېدرلېنډ ته ماته ورکړه.

شهزاد په ۲۰۱۰ اسیا جام ټرافي ایلایټ سیالیو پر مهال لوبډله کې شامل و، د هغه د ښې لوبې له امله افغانستان، نېپال ته په ۹۵ منډو ماته ورکړه.

له دې وروسته په ۲۰۱۰ م کال کې د دوهمه درجه هېوادونو پړاوي کرکټ لیګ پیل شو، چې شهزاد پکې دوه نیمه سلیزې د نېدرلېنډ خلاف ووهلې او افغان لوبډلې په ټول ټورنمنټ کې دریم مقام واخېست.

۲۰۱۳ م کال کې شهزاد د نمېبیا خلاف سلیزه ووهله او بله لوبه کې یې پنځوسیزه ووهله او دواړو لوبې افغانستان وګټلې.

شهزاد او شل اوریزې لوبې
د ۲۰۱۰ کال په فبروري کې شهزاد د شل اوریزو لوبو پیل وکړ، هغه یو درې اړخیز ټورنمنټ و او دا سیالۍ د نړیوال شل اوریز جام لپاره کیلي وه.

افغان لوبډله په دغه سیریزکې وځلېده او د ۲۰۱۰ م کال نړیوال شل اوریز جام ته افغان لوبډلې لار وموندله.

په دغه سیریزکې شهزاد درې نیمه سلیزې ووهلې.

افغان لوبډلې پایلوبه ایرلېنډ ته وبایلله؛ خو شهزاد محمدي پکې نیمه سلیزه ثبت کړې وه.

۲۰۱۵ کال کوالیفای سیالیوکې شهزاد ۷۴ منډې وکړې، هغه دغه منډې د عربي متحده اماراتو پر وړاندې ترسره کړې.

دا مهال افغان لوبډلې خپل د شل اوریزو لوبو ستر هدف عربو ته ورکړ، ۲۱۰ منډې هدف و، چې شهزاد او اصغر افغان په ۶۳ توپونو ۱۱۰ منډې ملګرتیا کړې وه.

شهزاد په دغو لوبو کې په ۲۶ توپونو نیمه سلیزه ووهله او بل ځل یې په ۳۶ توپونو ۷۵ منډې کړې وې.

شهزاد محمدي او سوداګریزې لوبې
۲۰۱۶ کال کې د بنګله دېش په سوداګریز کرکت لیګ کې له رنګپور رایډرز لوبډلې سره یو ځای شو، چې د دې لوبډلې مخکښ توپ وهونکی و او اتلولي هم د دوی لوبډلې وګټله.

په لومړۍ لوبه کې یې ۸۰ ناسوځېدلې منډې وکړې.

هغه د رنګپور لوبډلې لپاره په ۱۱ لوبو کې ۳۵۰ منډې کړې وې.

۲۰۱۸ او ۱۹ کلونوکې شهزاد له چېټاګانګ لوبډلې سره لوبېږي.

۲۰۱۸ کال کې د افغانستان په سوداګریزکرکټ لیګ کې د پکتیا لوبډلې لوبډلمشر شو او په دغه ټورنمنټ کې تر ټولو مخکښ منډې جوړوونکی و. هغه ۳۴۴ منډې وکړې.

۲۰۱۷ کال کې د آې پي ایل بولي ته وړاندې شو؛ خو ونه پېرل شو.

د دې سربېره هغه په شپږیزه لیګ کې لوبېدلی او په رحمت شاه زُرمتي د ۵ شپږیزو ریکارډ هم لري.

هغه په سپین غر لوبډله کې لوبېدلی او په نورو ډېرو لوبډلو کې هم لوبېدلی د پاکستان چیتا لوبډلې او نورو کلبونو سره ډېرې لوبې کړي دي.

د شهزاد ریکارډونه
شهزاد په ۲۰۱۶ م کال کې د زِمبابوې خلاف په شل اوریزه لوبه کې په ۶۸ توپونو ۱۱۸ منډې وکړې او له ویرات کولي څخه مخکې شو.

شهزاد محمدي په دوهمه درجه لوبغاړو کې دوهم نمبر دی، چې زیاتې منډې یې کړي دي، لومړی د هانکانګ بابر حیات دی، هغه ۱۱۲ منډې کړي دي.

شهزاد محمدي مخکې په شل اوریزو لوبو کې شلم توپ وهونکی و؛ خو د دې سلیزې پرمټ تر اتم نمبر راغی او اوس یو ځل بیا ۱۴ م نمبر ته رسېدلی دی.

په ۲۰۱۶ م کال کې شهزاد د دوهمه درجه کرکټ هېوادونو د لوبغاړو په منځ کې لومړی لوبغاړی و، چې لس نیمه سلیزې یې وهلې وې.

په ۲۰۱۶ کال کې یې د دوهمه درجه هېوادونو د لوبغاړو جایزه هم واخېسته.

په ۲۰۱۷ م کال کې د صحرا جام سیالیو پر مهال یې دوه نیمه سلیزې په یوه ورځ وکړې، ۸۰ منډې یې د عمان خلاف وکړې او ۵۲ ناسوځېدلې منډې یې د ایرلېنډ خلاف وکړې.

په دې ډول شهزاد په یوه ورځ دوه نیمه سلیزې ووهلې، چې تر اوسه یو لوبغاړي هم نه دي وهلي.

شهزاد محمدي په نړۍ کې دوهم لوبغاړی و، چې شل اوریزو لوبو کې یې ۲۰۰ څلوریزې وهلې وې.
لومړی سریلانکایي دېلشن و.

بندیزونه
په ۲۰۱۶ م کال کې یې د بنګله دېش سوداګریز لیګ پر مهال له شبیرالرحمن سره فزیکي شخړه وکړه، چې د بنګله دېش کرکټ بورډ شهزاد ۳۰ سلنه نغدي جریمه کړ.

۲۰۱۷ کال کې شهزاد د ډوپېنګ یا ځواک ورکوونکو درملو د خوړلو له امله پړ وپېژندل شو او یو کال له لوبو محروم و.

د لیکوال/ لیکوالې په اړه

سمیع الله درانی