سیاست نړۍ

د ولسمشر غني بله کاپي؛ د السالوادور ولسمشر په ټویټري پيغامونو چارواکي ګوښه کوي

لیکنه: بشر درویش
اعلان

د ولسمشر غني په اړه دا خبره مشهوره ده، چې پر حکومتي څوکیو ګومارنې او انفکاک دواړه یې تر ډېره د فیسبوک شبکې له لارې کیږي.

پر ده دا تور ان د ده د حکومت شریکوال( ډاکټرعبدالله) هم پورې کړی.

عبدالله، چې ورسره د ګډ حکومت د هوکړې له مخې ښاغلی غني باید په ټولو لوړپوړو ګومارنو او انفکاکونو کې مشوره وکړي او هغه ته هم نېمایي ونډه پکې ورکړي، څه موده مخکې د وزیرانو شورا د غونډې پر وخت پر ولسمشر له دې اړخه نیوکه وکړه.

هغه وویل: زه او ډېر وزیران د فیسبوک له لارې خبریږو، چې کوم وزیر یې نوی ټاکلی او کوم یې ګوښه کړی دی.

د ولسمشر بله کاپي

دلته د یوه بل هېواد نوی ټاکل شوی ولسمشر او هغه ورته والی یې درسره شریکوو، چې د ولسمشر غني کاپي ګڼل کیږي.

دا کس د السالوادور نوی ټاکل شوی ولسمشر دی، چې د ټاکنیزو کمپاینونو پر وخت یې هم زیاته تکیه پر ټولنیزو رسنیو وه او اوس هم ډېر کارونه د همدغو رسنیو او خاصتاً د ټویټر شبکې له لارې کوي.

دا ولسمشر نجیب ابوکیله نومیږي او ۳۷ کلن دی.

هغه مخکې تر دې د پلازمېنې سان سالوادور ښاروال و، چې تېره شنبه یې د ولسمشر په توګه د لوړې مراسم پرځای کړل.

ابوکیله د واک پر ګدۍ له کیناستو سره اکثره مخکیني چارواکي د ټویټر په ټویټونو ګوښه او پرځای یې نور چارواکي وټاکل.

څوک یې ګوښه کړل؟

ولسمشر ابوکیله ترډېره هغه کسان ګوښه کړل، چې د مخکیني ولسمشر سانچز سرن له نیږدې کسانو ګڼل کیدل.

هغه تېره سې شنبه په یوه ټویټ کې ولیکل: د لمریزې انرژۍ د کمیسون ریس ته امر کیږي، چې د مخکیني ولسمشر سانچز سرن لور کلاودیو سانچز ویلالتا له دندې ګوښه او پرځای یې یو بل څوک وټاکي.

د ټویټر په اړه یې

د ابوکیله ټویټر ۷ سوه زره فالورز یا څارونکي لري.

هغه ډېر نور کسان هم په یاده بڼه ګوښه کړي یا ګومارلي دي.

جالبه دا ده، چې د ابوکیله له ولسمشر کیدو سره د هېواد ډېر نور چارواکي یې هم ټویټري شوي.

د ده هغه مامورین، چې دی ورته د ځینو چارو په اړه امر کوي، سمدستي دی په ټویټر کې بیرته مینشن کوي او ډاډ ورکوي، چې امر یې ترلاسه کړی او سمدستي اقدام به کیږي.

غبرګونونه څه دي؟

د ابوکیله دغه ټویټري حکومتولي هم له نیوکو او هم له هرکلي سره مخ شوې ده.

د هغه پلویانو د حکومتولۍ دغه بڼه ستایلې او ویلي، چې اسانه او موثره لاره ده.

خو مخالفینو یې ویلي، چې ابوکیله دیکتاتوري کوي او دا د حکومتولۍ مناسبه او انساني طریقه نه ده.

ټرمپ د هېرولو نه دی!

له ابوکیله څخه مخکې د امریکا ولسمشر ډونالډ ټرمپ هم ټویټري ګومارنې، انفکاک او نور احکام ډېر صادر کړي.

هغه هم ډېر خلک د ټویټر په وسیله ټاکلي، ګوښه کړي او ان له هېوادونو سره ناندرۍ یې د دغې شبکې په وسیله پیل کړي.

جالبه دا ده، چې د یاد شوي هېواد نوي ولسمشر ته هم ټرمپ په ټویټر کې د ټاکل کیدو مبارکي ویلې او د همکارۍ ډاډ یې ورکړی.

د لیکوال/ لیکوالې په اړه

بشر درویش

بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي