ګنګولي: هند به په نړیوال جام کې د ریشب پنت تشه احساس کړي

لیکنه: عبدالله عادل

د ۱۲م پړاو ای پي ایل تجارتي سېالیو د پای ته رسېدو سره سم دا مهال د هند تمرکز په انګلنډ کښي پر کېدونکی ۲۰۱۹ نړیوال جام باندي دی.

د ای پي ایل شل اوریزو سېالیو پر مهال ټولو هیوادونو د راتلونکي ۲۰۱۹ کال نړیوال جام لپاره لوبډلې اعلان کړې.

د نورو هیوادونو تر څنګ هند هم نړیوال جام ته ۱۵ کسیزه لوبډله انتخاب او اعلان کړه چي په دغه ۱۵ کسیزه لوبډله کښي د ډهلي کپیټلز لوبډلي لپاره لوبېدونکی پیاوړی لوبغاړی ریشب پنت شتون نه درلود.

د چپ لاسي ویکیټ کیپر توپ وهوونکي ریشب پنت پر ځای دنېش کارتیک انتخاب سوی څوک چي له ریشب پنت څخه ښه تجربه لري .

په هر صورت سوراو ګنګولي څوک چي په ای پي ایل تجارتي سېالیو کښي د ډهلي کپیټلز لوبډلي مشاور وو وایي چي شین لباسي (هند) به د یو ورځنیو لوبو په راتلونکي نړیوال جام کي د ریشب پنت تشه احساس کړي.

ریشب پنت په تازه پای ته رسېدلي ای پي سېالیو کښي د خپلي لوبډلي ډهلې په ګټه یو شمیر لوبي په یوازي ځان وګټلې چي د نوموړي د یادوني وړ لوبه د حیدراباد پر وړاندي د ډهلي لوبه وه.
په کومه لوبه کښي چي پنت په ۲۱ توپونو ۴۹ منډي جوړي کړې او هغه لوبه ډهلي په ۲ ویکیټو وګټل.

د هند تجارتي سېالیو (IPL)پر مهال ریشپ پنت په ۱۶ لوبو کښي ټولټال ۴۸۸ منډي جوړي کړې .

سوراو ګنګولي د دوشنبې په ورځ هند کښي د خبریالانو سره د خبرو پر مهال دا ښکاره کړه چي هند به نړیوال جام کي د پنت کمی احساس کړي.
د نوموړي په وینا د ریشب غوندي لوبغاړی خو باید د هند په لوبډله کښي شامل سوی وی.

ګنګولي وايي

” هند به نړیوال جام کي د ریشب پنت تشه احساس کړي, زه نه پوهېږم چي دا تشه به د چا پر ځای احساس سي خو تشه به حتمن وي.”

د هند د غوراوي کمېټې مشر پرساد د لوبډلې د اعلان پر مهال د ریشب پنت ستاینه کړې وه خو د نوموړي د وینا پر اساس دوی د کارتیک او پنت تر منځ باید یو انتخاب کړی وی تر څو د مهیندر سینګ دهوني د خوږ یا نه لوبېدو په صورت کښي د هغه تشه ډکه کړي .
د پرساد په وینا چي وروسته یې دنېش کارتیک انتخاب کړ او ریشب پنت یې په احتاطي لیست کښي له ځان سره واخیست.

ریشب پنت تر دا مهاله د هند لپاره ۵ یو ورځنۍ لوبي ترسره کړي چي ټولټال ۹۳ منډي یې پکښي جوړي کړي.
بل لور ته دنیش کارتیک بیا د هند لپاره ۹۱ یو ورځنیو لوبو کښي ۱۷۳۸ منډي جوړي کړي.

دا مهال هند د اسټرالیا او انګلنډ تر څنګ له هغو پیاوړو لوبډلو څخه ګڼل کیږي چي د نړیوال جام ګټلو ښه موقع لري .

اوس پوښتنه داده چي آیا هند به وکولای سي چي په انتخاب سوې ۱۵ کسیزه لوبډله نړیوال جام کړي دا هغه پوښتنه ده چي وخت به یې ځواب کړي.

About سپورټ یاران 251 Articles
دا لیکنه د یاران سپورټ ټیم چمتو کړې