سپورټ کورنی کرکټ نړیوال کرکټ

پښتون لوبډله د ‍۱۰ اوریزه سیالیو پای لوبې ته ورسیده !

 د کرکټ په ۱۰ اوریزه سیالیو کې د ګډون کوونکو ۸ لوبډلو څخه پښتون ټیم د لمړۍ لوبډلې په توګه دویم پړاو پای لوبې ته ورسیده.

د دغه سیالیو پای لوبې ته د رسیدو په موخه پښتون لوبډله د نورترن ویریرز لوبډلې سره په سیالۍ کې مخ وه، چې پښتون لوبډلې په لمړۍ توپ وهنې د پاکستاني شاهد افریدي د ۵۹ او افغان شفیق الله شفق د ۲۲ زیاتو منډو جوړولو سره د لوبې په ټاکلو ۱۰ اورونو کې مقابلې لوبډلې ته د ۱۳۶ منډو هدف ورکړ، خو په ځواب کې یې نورترن لوبډله په ترلاسه کولو کې پاتې‌ راغله.

 د ټي ټین په نوم د کرکټ ۱۰ اوریزه سیالۍ د تیرې نوامبر میاشتې په ۲۱ مه نېټه د متحده عربي اماراتو په شارجه نړیوال لوبغالي کې پيل شوې دي، چې پکې د (پښتون، پنجابي لیجنډز، سندز، نارترن ویریرز، راجپوټز، مراتا اربینز، بنګال ټایګرز او کیراله نایټزز) لوبډلو ګډون کړی و.

د لمړي پړاو څخه تیره ورځ د نورترن ویریرز، پښتون، بنګال ټایګرز او مراتا اربینز لوبډلې دویم پړاو ته ورسیدې.

 پښتون لوبډله په دې بریا سره په مستقیم ډول پای لوبې ته ورسیده، خو نورترن لوبډله لا هم د بنګال ټایګرز او مراتا اربینز سره یو ځای پای لوبې ته د رسیدو بله موقع هم لري.

 د نن شپې په دویمه لوبه کې د بنګال ټایکرز او مراتا اربینز لوبډلو ترمنځ د سیالۍ ګټونکې لوبډله به د همدې نرترن ویریرز سره پای لوبې ته د رسیدو په موخه نن شپه وروستۍ مهمه لوبه ترسره کړي.

 د یادونې وړ ده، چې د دې سیالیو پای لوبه سبا د ډیسمبر میاشتې په دویمه نېټه په شارجه نړیوال لوبغالي کې ترسره کيږي.

د لیکوال/ لیکوالې په اړه

احسان الله ساپی