لوبې

نن د هندوستان د کرکټ د کورني لیګ سیالۍ په شاندارو مراسمو پیلیږي

د هندوستان د کورني کرکټ غوره لیګ او په نړیواله کچه مشهوره (اۍ پي ایل) د کرکټ ۲۰ اوریزه تجارتي سیالۍ نن ( شنبې ) پیلیږي.

د شور او شرنګ پرانیسته

هندي رسنۍ وايي چې سږ کال به ددې سیالیو د پیل مراسم تر پخوا ډیر تاوده، او د سپورت د نړۍ سربیره به په کې فلمي ستوري هم خپل هنر نندارې ته وړاندې کړي.

پرینیتي چوپړا، هیریتک روشن، جاکولین فرننډاز او نور هغه فلمي لوبغاړي دي چې د هندوستان د کورنۍ کرکټ په سیالیو کې هنرنمايي کوي. رنویر سینګ هم ټاکلې وه د شنبې د ورځې په مراسمو کې برخه واخلي، خو د ټپي کیدو له کبله اوس د اۍ پي ایل په پرانیسته کې ګډون نه کوي.

ممبی انډیز او چیانی سوپر کینګز لومړۍ لوبه کوي

ددې لوبو پیل : د «اۍ پي ایل» ۲۰ اوریزه کرکټ تجارتي سیالیو د ۱۱ م پړاو لمړۍ لوبه به د هندوستان په ممبيي کې د تیر کال دفاعي اتلې ممبي اِنډیز او چیناي سوپر کینګز لوبډلو ترمنځ ترسره شي، چې پکې به ممبي لوبډله د خپلې تېرې اتلولۍ څخه دفاع کوي.

په دغه لیګ کې ټولې ۸ لوبډلې شاملې دي، چې پکې د دوه کلن بندیز وروسته د چینایي سوپر کینګز او راجستان رایلز لوبډلې هم بیرته ګډونوالې شوې دي.

په دغه مشهوره کرکټ لیګ کې رایلز چیلینجرز بنګلور د هندي کپتان ویرات کوهلي، ممبي اِنډینز د هندي مرستیال کپتان روهیت شرما، چینایي سوپر کینګز د پخواني هندي کپتان مهیندر سینګ ډوهني، کینګز ایلون پنجاب د راوي چندران اشوین، سنرایزرز حیدر اباد د نیوزلینډي کپتان کین ویلیمسن، راجستان رایلز د هندي اوپنر اجینکې ریحاني، کلکته نایټ رایډرز د دینیش کارتیک او ډهلي ډرایډ ویلز د ګاتم ګمبیر په لوبډلمشرۍ کې دا ځل لوبیږي.

د سنرایزرز حیدر اباد، کینګز ایلون پنجاب او راجستان رایلز هغه لوبډلې دي، چې د لمړي ځل لپاره پکې ۴ افغان لوبغاړي لوبیږي، چې په دغه لیګ کې د لوبیدو په موخه ټول هندوستان ته رسیدلي دي.

د هندوستان د «آي پي ایل» ۲۰ اوریزه کرکټ تجارتي سیالۍ، چې د اپریل میاشتې د ۷ مې نېټې څخه پیل کیږي؛ د راتلونکې مۍ میاشتې تر ۲۷ مې نېټې پورې به دوام وکړي، چې پکې به ټول ۶۰ لوبې ترسره شي.

له فیسبوک تبصرې

تبصرې

د لیکوال/ لیکوالې په اړه

احسان الله ساپی