ټولنیز ژوند خواړه وزش او تمرین

د ورزشي سیالیو د نندارې پر وخت دا شیان خورئ

لیکنه: بشر درویش

د ورزشي سیالیو ننداره افغان ځوانان او ځینې عمر خوړلي اکثره د تلویزون په وسیله کوي.

کرکټ، فوټبال، فري فایټ او ځینې نورې لوبې په افغانستان او له افغانستانه د باندې د افغانانو لخوا زیات ننداره کیږي.

د دغو لوبو ننداره ، هغه هم د تلویزون پر وخت یوازې خوند نه کوي.

په ښاري او له سرګردانۍ نه ډک ژوند کې د همداسې سیالیو ننداره ډېر وخت پلمه کیږي، چې ځوانان او پخواني یاران په لویو دېرو حجرو کې سره ټول او یوه خوله خندا او بنډار هم سره وکړي.

چې داسې ده نو یوازې خبره د سیالیو تر نندارې نه ده؛ د تلویزون کتلو پر وخت که څوک یوازې وي یا د دوستانو په بنډار کې وي، په هرحالت کې د سیالیو د نندارې ترڅنګ له غرمنۍ او ماښامنۍ پرته د ځان بوخت ساتلو لپاره بل خوراک هم ضرور وي.
دلته پرهمدې بحث کوو، چې کوم شیان د تلویزوني نندارې پر وخت راته ښه دي، چې ویې خورو.

ولې دا بحث مهم دی؟
د لندن پوهنتون یوه څېړونکي پروفیسور بري اسمیټ چې دا موضوع یې څېړلې، د بحث اهمیت دا ګڼي چې د تلویزون لیدو پر وخت په ناخودآګاه ډول ډېری وخت نندارچیان داسې شیان خوري، چې روغتیا ته یې ډېر تاوان اړوي.

د هغه د څېړنې له مخې، په دغه وخت اکثره خلک خواږه کیک، چاکلیټ یا نور داسې خوراکي توکي استعمالوي چې صحت ته یې ضرر لري.

پروفیسور اسمیټ موندلې، چې د دغو خوراکونو د خطرناکتوب یو دلیل دا دی، چې د تلویزوني نندارو پر وخت اکثره مهال نندارچي په ناخودآګاه ډول له حده زیات خوراک هم کوي.
د زیات خوراک دلیل دا دی، چې نندارچي د خوراک په نسبت یې ډېر تلویزون ته متوجه وي.

څه خوړل څښل په کار دي؟
پروفیسور اسمیټ وایي د تلویزوني سیالیو د نندارې پر وخت د خوراک لپاره ښه ترکېب دا دی چې له نانا او زیتون غوړیو سره په ګډه کباب پاخه او وخوړل شي.

د دې ترڅنګ د څښاک لپاره یاد شوي پروفیسور د تروشې آلوبالو د اوبو څښل ګټور ګڼلي.

د دغه خوراک څښاک دلیل او ښیګڼه دا ښودل شوې چې د تلویزوني سیالیو د نندارې له کبله د نندارچي د وجود ضایع کیدونکې انرژي پوره کولای او د مسلسلې ناستې او ډېرې ذهني نارامۍ او تمرکز په وسیله رامنځته کیدونکي جانبي عوارض دفع کولای شي.

د لیکوال/ لیکوالې په اړه

بشر درویش

بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي