افغانستان سپورټ کورنی کرکټ نړیوال کرکټ

نړیوال جام له افغانستانه په شاندارو مراسمو رخصت شو؛ دلته دا هم ولولئ چې کومو ځایونو ته یوړل شو؟

لیکنه: سمیع الله درانی

د کرکټ نړیوالې شورا ویلي، چې د نړیوال جام لپاره په افغانستان کې خورا ښه ترتیبات او مراسم نیول شوي وو.
دوی ویلي چې د دې ټرافي په لومړۍ ورځ د ارګ ماڼۍ کې ډېر مناسب ترتیبات نیول شوي وو او ولسمشر محمد اشرف غني د دې ټرافي ډېر درناوی وکړ، له دې وروسته ولسمشر وویل، چې یوه داسې ورځ به هم راشي، چې افغان لوبډله به دا جام افغانستان ته د دایم لپاره راوړي او ګټي به یې.
اشرف غني له افغانانو وغوښتل چې کرکټ سره مینه وکړي.

له دې وروسته د نړیوال جام ټرافي له ارګ څخه د دارالامان ماڼۍ ته یوړل شوه، دغه ماڼۍ د شلمې پېړۍ په لومړیو کې د افغان اتل پاچا غازي امان الله خان له خوا جوړه شوې ده؛ دغه پاچا د کرکټ د څښتن هېواد انګلستان څخه د افغانستان خپلواکي اخېستې ده.

له دې وروسته د افغانستان د ملي راډیو تلویزیون ودانۍ د نړیوال جام کوربنه شوه، هلته د افغان کرکټ بورډ له خوا دغه جام ته خورا ښه مراسم نیول شوي وو، په لوړه کچه دولتي چارواکي هم په دغو مراسمو کې حاضروو، د دې سربېره په دغو مراسمو کې د مدني ټولنو غړي، د رسنیو غړي او د کرکټ ګڼ شمېر مینه وال موجود ول.

د نړیوال جام دوهمه ورځ :


په دوهمه ورځ نړیوال کرکټ جام له کابل څخه د افغانستان مرکزي او با امنه ولایت بامیانو ته ولېږدول شو، هلته د بامیانو په تاریخي ځایونو کې وګرځول شو، په بامیانو کې د بودا تاریخي مجسمې هم موجودې دي.

په بامیانو کې د کرکټ بورډ او بامیانو ولایتي چارواکو په ګډې همکارۍ شاندار مراسم ترسره شول او خلکو خوښي ښکاره کړه.
هلته د دغه جام هرکلي ته ولایتي چارواکي، د ښوونځیو زده کوونکي، د کرکټ مینه وال، انځورګران، د کرکټ چېئرمېن یا مشر عزیزالله فضلي، د بامیان والي طاهر زُهېر او اصغر افغان ولاړ وو.
د بامیان والي وویل، چې کرکټ ښه لوبه ده او د دې لپاره به په بامیان کې کار کوي، چې دا لوبه لا وغوړېږي.
د نړیوال جام د ور وړلو پر مهال په بامیان ولایت کې د بزکشي لوبه هم وشوه، چې د نړیوال جام د هرکلي په موخه جوړه شوې وه.

د نړیوال جام دریمه ورځ او هرات ته سفر:
د دوهمې ورځې په ماښام د کرکټ بورډ چارواکو او لوبغاړو د هېواد لویدیځ ولایت هرات ته پرواز وکړ، دلته هم ډېر په زړه پورې مراسم چمتو شوي وو.
د کرکټ نړیوال جام ته د هرات د والي په ماڼۍ کې ښه راغلاست وویل شو، د هرات والي محی الدین د دې مراسمو په راس کې و.

هرات ځکه وټاکل شو، چې دا ولایت هم د هېواد یو تاریخي ولایت دی او دلته د کرکټ په پرتله فوټبال سره خلک ډېره لېوالتیا لري؛ نو د کرکټ نړیوالې شورا ځکه هرات ولایت هم په سفر کې شامل کړ، چې د دی ځای تنکي ځوانان کرکټ لوبو ته رامات کړي او مینه یې ورسره پېدا شي.

له دې وروسته دا جام د هرات مشهور منار جام ته هم یوړل شو، چې د هېواد په تاریخي عابداتو کې راځي.
له دې وروسته شا او خوا د ۲ نیم زره کسانو په شتون کې جام د مولانا جلال الدین بلخي صالون ته یوړل شو.

د نړیوال جام څلورمه ورځ او کندهار ولایت:
د نړیوال جام وروستۍ ورځ کندهار ولایت کې وه، کندهار د افغانستان هغه ولایت دی، چې دا د افغانستان د امپراتورۍ مرکز و او احمدشاه دُراني خپله ټوله امپراتوري له همدغه ولایت څخه رهبري کوله.

د کرکټ نړیوالې شورا په خپله وېب پاڼه کې لیکلي، چې د احمدشاه دُراني د روضې شا او خوا انځورونه لګېدلي وو او یوه ښکلې منظره یې رامنځته کړې وه.
کندهاري وګړي د ولایت مقام ته راغلل او نړیوال جام ته یې په سندرو، سازونو او ډولونو هرکلی ووایه.

د کرکټ نړیواله شورا وایي افغانستان کې د کرکټ نړیوال جام یا کپ پوره او بې جوړې هرکلی وشو او دا د دې څرګندونه کوي، چې افغانان د جنګ خلک نه؛ بلکې د مېلمه پالنې او علم خلک دي.

د کرکټ جام د رخصتېدو پرمهال د کرکټ بورډ ټول چارواکي ولاړ وو او په خورا درناوي یې جام له هېواده رخصت کړ.
د کرکټ بورډ اجرایوي مشر وویل، چې د کرکټ نړیوال جام او افغانستان ته یې راوړل د دې څرګندونه کوي، چې افغانان د امن خلک دي او دې چارې د افغانانو د کلتور درست انځور خلکو او نړیوالو ته وړاندې کړ.

د چهارشنبې په ورځ د ډېسمبر په ۲۶ مه نېټه نړیوال جام له عربي متحده اماراتو څخه افغانستان ته راوړل شوی و او د یکشنبې په ورځ د ډېسمبر په ۳۰ مه نېټه دا جام بېرته له افغانستان څخه یوړل شو.

د کرکټ د مینه والو نظرونه:
دلته ځېنې مېشت افغانان او د کرکټ مینه وال بیا وایي، چې دا جام باید ننګرهار ته هم راوړل شوی وای، د دوی په وېنا دا ځکه چې ننګرهار د کرکټ کور دی او له دې ځایه د افغانستان ملي لوبډلې پیل کړی دی او اوس هم ډېری تنکي ځوانان په مختلفو کرکټ اکاډومیانو کې د مسلکي کرکټ په زده کولو بوخت دي.

د لیکوال/ لیکوالې په اړه

سپورټ یاران

دا لیکنه د یاران سپورټ ټیم چمتو کړې