سوکاله کورنۍ دا ۵۰ ځانګړتیاوې لري

ژباړه: بشر دروېش

ـ په یوه غوره کورنۍ کې د یو بل له نامه سره د «جان» ټکی زیات کارول کیږي. لکه: پلارجان، مورجانه، زوی جان، لورجانه…

– د کورنۍ هیڅ غړی پر بل غړي بې باوره نه وي.

– په اونۍ کې حتماً یو ځل ځانګړي خواړه په ګډه ټاکي، پخوي او د خوراک په پلمه یې خوشاله شېبې تېروي.

– غړي یې یو بل په غېږ کې نیسي او خپل صمیمیت څرګندوي.

– یو بل ته تازه مېوه سپینوي.

– د ټولو د خوښې وړ یوه یا څو سندرې لري او په ګډه یې ځينې وخت اوري. لکه: پلار، مور یا ورور ته ویل شوې سندرې.

– په ټوله کې؛ بالخصوص د کورنیو مراسمو یا تلویزون لیدو پروخت ګاونډیانو ته د نه مزاحمت فکر کوي.

– په کورکې داسې یوه تابلو لري، چې مشترک احساس، انساني پيغام او یوه ښه روحیه وړاندې کوي.

– لږ ترلږه په میاشت کې یو ځل ګډه ناسته کوي او پر هراړخیزو کورنیو مسئلو بحث او مشورې پکې کیږي.

– د کورنۍ ماحول داسې دی، چې اولادونه پکې له خپل مور وپلار سره د زړه خواله کوي.

– د کورنۍ مور ته د عاجلو خوړو د تیارولو مهارت زده وي، کله یې چې اړتیا پېښه شي زر یې برابروي.

– د کورنۍ ټول غړي د لګښتونو په برابرولو او کمولو کې له پلار سره مرسته کوي.

– مور و پلار د اولادونو خونې ته له ورتلو سره دروازه ټکوي.

– په میاشت کې لږ ترلږه یو ځل یو تفریحي یا بل فلم په ګډه ویني.

– یو کتابتون لري او وخت په وخت مراجعه ورته کیږي.

– د کورنۍ پلار په اونۍ کې یو ځل له اولادونو او مېرمنې سره یوه پارک ته ځي.

– په هر ډول شرایطو کې د ورځې یو ځل حتماً په ګډه ډوډۍ خوري.

– مور و پلار وړو ماشومانو ته له ویدیدو مخکې یوه کیسه کوي.

– د کور د مهمو وسایلو په اخیستو کې مشوره سره کوي.

– مور و پلار پکې د میاشتې یو ځل حتماً له ماشومانو پرته تفریح کوي.

– د کورنۍ پلار اولادونه مکلفوي، چې له مور سره د کور په چارو کې لازمه مرسته وکړي.

– په بحراني حالاتو کې د غوسې یا یو بل ته د پيغام استولو پرځای د خبرو له لارې په سړه سینه ستونزې حلوي.

– د کورنۍ غړي پلان جوړوي چې په څومیاشتو کې یوځل په ګډه ځينې مهم کتابونه وپېري.

– د کورنۍ غړي که نور څه نه وي، د مور و پلار جامې او لباسونه اوتو کوي.

– د کورنۍ هر غړی له ځانګړي او جلا خوراک څخه وروسته خپل لوښي خپله وینځي.

– د کورنۍ هلک، له خور سره په سودا پیرلو او چارو کې مرسته کوي.

– د کورنۍ ټول غړي له اصراف سره حساس دي او یو بل ته یې د نه کولو سپارښتنه کوي.

– هغه وخت چې د کورنۍ ګډ مجلس وي، یو هم ټلیفوني پيغامونو ته ځواب نه وایي؛ بلکې کورني مجلس ته پرهرڅه لومړیتوب ورکوي.

– د کورنۍ هلکان له هلکانو او نجونې له نجونو سره لازمې او ممکنې لوبې کوي.

– د کورنۍ غړي له هغه غړي څخه تر ډوډۍ خوړلو وروسته مننه کوي او پخلی یې ستایي، چې ډوډۍ یې تیاره کړې وه.

– که کوم غړی اقتصادي تاوان کوي، یا بلې ستونزې سره مخ کیږي، ټول ډاډګیرنه ورکوي او ورسره ودریږي.

– مور او لور ځينې وخت په ګډه سودا اخیستو او تفریح ته ځي.

– د ګډو عکسونو او خاطرو البم لري او وخت په وخت یې ګوري.

– اولادونه په مختلفو مناسبتونو کې، په مختلفو پلمو د مور و پلار لاسونه ښکلوي.

– په میاشت کې یو ځل وخت بېلوي، خاص مجلس ته کیني او خاطرې سره شریکوي.

– مور وپلار هره ورځ د اولادونو له وضعیته ځان خبروي، لارښوونې ورته کوي او مشورې ورکوي.

– مور وپلار اولادونه د « زویه» او «لورې» په کلیمو په مودبانه ډول مخاطبوي.

– د کورنۍ مور ټول غړي هڅوي چې په اونۍ کې حد اقل یو ځل شخصي مسایل ورسره شریک او د هرڅه په اړه ډاډ ورکړي.

– اولادونه له نیکه او نیا څخه وخت په وخت د تېرو خاطرو بیان غواړي.

– د مجلو، ورځپاڼو او کتابونو مهم ټکي له یو بل سره شریکوي.

– د کورنۍ پلار د کورنۍ د ډوډۍ پر حلال والي خورا ډېر ټینګار کوي.

– که د کورنۍ یو غړی غوسه کیږي، بل ورته عاجل یو ګیلاس اوبه راوړي او هغه یې څښي.

– د یو بل په ټلیفون او نورو شخصي فایلونو کې غرض نه کوي.

– که کله ډوډۍ کمه شي، یا لږه بې خونده وي، د کورنۍ غړي پرې ځان نه پوهوي.

– د کورنۍ غړي له کثافاتو سره حساس دي او کور پاک ساتي.

– یو بل ته وړې ډالۍ اخلي.

– په مذهبي مراسمو کې برخه اخلي او یو بل دغه کار ته هڅوي.

– ټلویزون د یوه کس په کنټرول کې نه وي؛ د ټولو ذوق ته درناوی کیږي او لازم مهالوېش له مخې تلویزون ګوري.

– د کورنۍ غړي د «ماته یې څه» او «تاته یې څه» خبرې یو بل ته نه کوي.

– پلار او زوی لږ ترلږه په میاشت کې یو ځل یو ځای ښار، یوه پارک یا هوټل ته ځي او دوستانه مجلس سره کوي.

About بشر درویش 375 Articles
بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي