ټولنیز ژوند خوندیتوب ژوند بڼه

نجونو ته! په دې خبرو جنسي غوښتنې رد او ځان وژغورئ

لیکنه: صادق طارق
اعلان

ژباړه او زیاتونه: صادق طارق

جنسي اړیکې د دې ترڅنګ، چې تحمیلي اړخ لري؛ عاطفي اړخ هم لري.

ډېرې هغه نجونې، چې په زوره، رضا یا غولول شوې بڼه د جنسي اړیکو قرباني شوي، عجیب و غریبې کیسې لري.

څېړنې څه وایي؟

څېړنې ښيي، چې د دوی یو نه ویل او یا د نه ویلو د جرئت لرل سبب شوي، چې له دوی ناوړه استفاده وشي او ژوند یې تباه شي.

د څېړنو په حواله زیاتې نجونې د ماشومتوب یا نوې ځوانۍ له وخته د جنسي هوس د لېونو قرباني کیږي.

هوس بازان له دوی څخه د استفادې لپاره مختلف دلایل او پلمې رامخته کوي او نجونې په عاطفي ډول مختلفو فشارونو لاندې راولي.

د نه ویلو زده کړه

دلته به یوه لنډه خو له پند او زده کړې ډکه مکالمه درسره شریکه شي، چې په وسیله یې نجونې د جنسي هوس له لېونو ځانونه ژغورلی شي.

تاسې که نجونې یاست دا مکالمه پخپل ژوند کې عملي کړئ، که مور و پلار یاست له خپلو نجونو سره یې مفهوم یا کیسه شریکه کړئ څو دوی د جنسي ځورونو او تلفاتو له شره خلاصې وي.

جنسي غوښتنه داسې رد کړئ!

دلته یوه عامه مکالمه شریکوو. د څېړنو له مخې هلکان یا نارینه اکثره وخت په مکالمه کې د ذکر شویو دلایلو له لارې نجونې د دوی د جنسي غوښتنو منلو ته مجبوروي.

تاسې که نجلۍ یاست، په ذکر شویو دلایلو دا غوښتنه رد او ځان له شره خلاص کړئ.

هلک: د یو بل لمسول د انسان د وجود د ودې سبب کیږي

نجلۍ: نه ته د ځان د ودې لپاره سمه مطالعه وکړه، زه دومره پوهیږم چې دا د ودې سبب نه دی، زما ژوند او راتلونکی خرابوي.

هلک: ته ماشومې غوندې چلند کوې!

نجلۍ: نه ماشوم ته یې، زه د لویانو چلند کوم. ته دې شاوخوا وګوره دې بې مسولیته چلند د څومره خلکو ژوند تباه کړی.

هلک: ته نوې تجربه نه زده کوې، دا تجربه ارزي چې یو ځل یې وکړو او خوند ترې واخلو!

نجلۍ: زه نوې تجربې خوښوم، خو چې سمې او خوشې نه وي. زه ستا د تجربو او خوند اخیستو وسیله نه یمه، چې ته را باندې لوبې وکړې.

هلک: ټول دا کار کوي…

نجلۍ: نه ټول یې نه کوي، بل چې څوک یې کوي، همغو پسې ورشه، زه دې والا نه یمه!

هلک: دې لپاره، چې د یو بل خوښیږو، باید سره مخته لاړشوو او سم د یو بل وجود نه خوند واخلو.

نجلۍ: زه نه غواړم، چې د خوښولو په نوم مې څوک رانه ناوړه ګټه واخلي.

هلک: خو زما خوښیږې!

نجلۍ: چې خوښیږم دې، دا کارونه به نه راسره کوې او احساسات به مې نه پایمالوې!

هلک: نو ته را وښیه، چې څومره دې خوښیږم، ووایه څه راسره کوې؟

نجلۍ: که دې خوښیږم، نو راته صبر وکړه، هرڅه به واده نه وروسته وشي.

هلک: ستا ستونزه څه ده؟

نجلۍ: زه هیڅ مشکل نه لرم، مشکل ته لرې، چې بې ځایه غوښتنې کوې، زما او ستا د دې خبرو او کارونو وخت نه دی، بې ځایه نور مه غږیږه!

هلک: څوک نه پوهیږي!

نجلۍ: زه خو پوهیږم، خدای خو مو هم ویني

هلک: تا زه اوس سخت مېن کړی یم، نه کیږي چې همداسې مې پریږدې، وجدان دې منې، چې خپه مې کړې؟

نجلۍ: زه ستا د احساساتو پارولو مسوله نه یمه، ما ته مې وجدان د اسلام او انسانیت خلاف کار اجازه نه درکوي. زه نه غواړمه چې خپل عزت، د خپل کور نوم او خپله آینده خرابه کړم.

هلک: که ته مې غوښتنه ونه منې، نور یې منې، زموږ اړیکه به خرابه شي!

نجلۍ: ځه ورکیږه، همغو پسې ځه، بد اخلاقه، بیا په دې نیت خوا له رانه شې!

 

 

د لیکوال/ لیکوالې په اړه

صادق طارق