ماشومان د کتاب لوستو په سیالۍ کې برخې اخیستو ته وهڅوئ

د کتاب لوستلو سیالۍ تر ډېره په ښوونځیو کې ترسره کېږي؛ خپل ماشومان مو وهڅوئ چې په دې ډول سیالیو کې برخه واخلي.

که مو یوځل ماشوم د کتاب لوستلو په سیالۍ کې د بریالیتوب خوند ولید، بیا به هېڅکله هم په دې ډول سیالیو کې د ګډون چانس له لاسه ورنه کړي او که پکې بریالی نه شو هم، تاسو باید خپل ماشوم وهڅوئ، څو د دویم ځل لپاره پکې برخه واخلي. کله کله تاسو خپله هم ورته وړې ډالۍ واخلئ، څو نور هم د کتاب لوستلو ته وهڅېږي.

ماشومان مو لیک لیکلو ته تشویق کړئ
د ماشوم په خټه کې د فکر کولو او کیسې ویلو غوټۍ موجودې وي، تاسو هڅه وکړئ چې هغه وغوړوئ. ماشومان مو وهڅوئ چې کیسه جوړه کړي، هغوی کولای شي په خپله کتابچه کې کیسه ولیکي او انځورونه ورته وباسي. کتابچه یې د یوه ارزښتناک یادګار په توګه ورته وساتئ او دوی ته دا وښایاست چې لیکل شوي شیان یې تاسو ته ډېر ارزښت لري.

د کیسو جوړولو ته د ماشومانو هڅول د هغوی تخیلي قدرت قوي کوي او له دې سره په څنګ کې ماشوم خپل احساسات هم څرګندولی شي. که ماشوم خپل احساسات په خپل ذهن کې وساتي او د څرګندولو موقع ورته برابره نه شي، د راتلونکې په اړه ناهیلی کېږي او فکري ځواک یې وده نه کوي.

About حمیدالله حمیدي 171 Articles
حمیدالله حمیدي په 1388 کال کې په کابل کې د افغانستان تخنیکي او مسلکي زدکړو په انستیتیوت (ATVI) کې د کمپیوټر ساینس ډېپارټمنټ څخه فارغ شوی. له ۲۰۱۱ م کال راهېسې سپوږمۍ راډیو سره دنده پیل کړې. له سپوږمۍ راډیو سره د کار کولو پر مهال یې د پښتو ادبیاتو د شپې پوهنځی لوستی او په ۱۳۹۶ کال کې د کابل د ښوونې او روزنې پوهنتون د پښتو ادبیاتو له څانګې فارغ شوی. حمیدي پر سپوږمۍ راډیو سربیره له نورو رسنیو سره هم همکاري کوي. په دې لړ کې له څه مودې راهېسې د یاران لپاره هم لیکنې چمتو کوي. په یاران کې د ښاغلي حمیدي د خپرو شویو لیکنو د بیا خپراوي حق د یاران له ادارې سره خوندي دی.