سیاست نړۍ

الیزابت وارن؛ هغه ښځه چې د ټرمپ پر وړاندې ولسمشریزې سیالۍ ته راوتې

لیکنه: بشر درویش

 

د امریکا د ۲۰۲۰ ولسمشریزو ټاکنو ته د دیموکرات ګوند سناتورې الیزابت وارن د خپلې نوماندۍ خبر ورکړی.

هغې له دې اعلان سره په دغو ټاکنو کې ځان د ډونالډ ټرمپ لومړنۍ سیاله ګرځولې ده.

د نوماندۍ اعلان

مېرمن الیزابت وارن د ۲۰۱۹ میلادي کال له پيل څخه یوه ورځ مخکې د امریکا راتلونکو ولسمشریزو ټاکنو ته د نوماندۍ اعلان وکړ.

هغې پرخپلې ټویټر پاڼې یوه ویډیو خپره کړه، چې پکې د امریکا د متوسطه طبقې پياوړتیا د نوموړې مهمه موخه ښودل شوې ده.

الیزابت ژمنه کړې، چې که ولسمشریزې ټاکنې وګټي د اقتصادي اصلاحاتو ترڅنګ به د لویو شرکتونو هغه اغېزې محدودې کړي، چې پر بانکونو او سیاسي پریکړو یې لري.

مېرمن وارن دغه راز ویلي، چې له فساد سره به جدي مبارزه او د دیموکراسۍ ساتنه به کوي.

د ټولو امریکایانو انساني او اساسي حقونو ته درناوی او فرد ـ فرد ته د اقتصادي اسانتیاوو او کار برابرول د ټرمپ د دغې ټاکیزې سیالې نورې ژمنې دي.

د مېرمن وارن به اړه

مېرمن وارن ۶۹ کلنه او له ۲۰۱۳ راهیسې د ماسوچوست ایالات د سناتورې په توګه فعاله ده.

هغه د ټرمپ د جمهوري غوښتونکي ګوند د مخالف ګوند (دیموکرات غوښتونکو) اړونده ده.

مېرمن وارن د هاروارډ پوهنتون د حقوقو پوهنځي استاده هم ده. هغې په تېرو ولسمشریزو ټاکنو کې د ټرمپ پروړاندې د خپل ګوند د نوماندې هیلري كلینټن ملاتړ کاوه.

هغه په ۲۰۱۶ کې د ټاکنیزو کمپاینونو پرمهال پر ټرمپ توندې نیوکې کولې او له ترټولو سرسختو مخالفانو څخه یې وه.

د ټرمپ او مېرمن وارن لفظي شخړو د ټرمپ د واکمنۍ پر مهال لا نور دوام وکړ.

پر ټرمپ د وارن تورونه

مېرمن وارن د ټرمپ د مالي سرچینو مشروعیت ترپوښتنې لاندې راولي او د دې ترڅنګ یې توکم پال او د جنیست په اړه د افراطي نظریاتو څښتن ګڼي.

ټرمپ بیا پر مېرمن وارن تور لګولی، چې احمقه، بد خولې او سطحي ښځه ده.

اقتصادي تمرکز

د مېرمن الیزابت وارن یو عمده تمرکز د امریکا پر اقتصاد د هغې ژورې نیوکې دي.

هغه د ټرمپ اقتصادي سیاستونه چې تر ډېره د پانګوالو په ګټه ګڼل کیږي، د امریکایي ټولنې د تباهۍ هڅې ګڼي.

مېرمن وارن په سنا یا مشرانو جرګه کې هم تل د ټرمپ پر اقتصادي سیاستونو سختې نیوکې کړي.

په ټوله کې د مېرمن وارن ادعا دا ده، چې دا د متوسطه اقتصاد لرونکو د پياوړتیا او مدافعت لپاره را میدان ته شوې ده.

دې ته په کتو سره له اوسه وړاندوینه دا ده، چې هغه به د لویو پانګوالو له سختو مخالفتونو سره مخامخه شي.

وخت یې لا پاتې

د امریکا دیموکرات ګوند به تر یوه بل کاله پورې د ۲۰۲۰ ولسمشریزو ټاکنو لپاره خپل وروستنی نوماند/ نومانده مشخص کړي.

ترهغې لا معلومه نه ده، چې له دیموکرات ګوند څخه به نور څوک د ټرمپ د مقابلې لپاره راووځي.

د امریکا د ولسمشریزو ټاکنو معمول دا دی، چې له یوه ګوند څخه په لومړیو کې څو تنه ولسمشریزو سیالیو ته را میدان ته کیږي، خو وروسته دوی د خپلمنځیو ټاکنو په پایله کې پر یوه نوماند/ نوماندې سلا کیږي.

د لیکوال/ لیکوالې په اړه

بشر درویش

بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي