‌نیشه د سر تېشه؛ هند کې شرابو ۸۴ کسان وژلي

په پښتو کې یوه اصطلاح کاریږي، چې وایي په نیشه کې یې تېشه ووهل شوه.
دا خبره که په هر نیت وي، خو په هند کې د همدې خبرې له روښانه او لفظي مانا سره سم د ځینو په نیشه کې څه چې په سر کې تېشه وهل شوې ده.

د بدلو شرابو زوی
د هند په آسام ایالت کې د بدلو شرابو د څښاک له وجې ۸۴ کسان وژل شوي.
د یاد شوي ایالت د روغتون چارواکو دوی ته د ۲۰۰ نورو ناروغانو د ور وړل کیدو هم ویلي.
ویل شوي دا ناروغان هم د بدلو شرابو د څښاک له کبله بستر شوي.

د روغتون یوه ډاکټر ویلي، چې بستر شوي ناروغان یې د نس له ډېر درد څخه شکایت کوي.

د دې ترڅنګ مسلسل استفراغ او د خولې د خوند خرابوالی یې نور شکایتونه دي.

د شراب پلورونکي نیول کیدل
د آسام ښار د سیمه ییز حکومت مشر سارباناندا سونووال د یادې پېښې په اړه د جدي پلټنو امر کړی.

پولیس چارواکي وایي، چې د دغو شرابو پلورونکی نیول شوی او د دوو مالیاتي چارواکو دندې هم له دې کبله ځنډول شوي، چې ولې یې د بدلو شرابو دغه پلورونکي ته د کار جواز ورکړی.

د اوترا پردیش پېښه
دوه اونۍ مخکې د هندوستان په اوترا پردیش او اوتاراکند ایالتونو کې د بدلو شرابو د څښاک له کبله څه باندې سل تنه مړه شوي وو.

هند د نړۍ له هغو هېوادونو دی، چې شراب څښل پکې ازاد دي.

دا کار سبب شوی، چې د غریبې طبقې خلک اکثره د اصلي شرابو د وس نه لرلو له وجې ارزانه او بدل شراب وڅښي.

اټکل کیږي، چې هر کال زرګونه تنه په دغه هېواد کې د بدلو شرابو له کبله مړه کیږي.

هندیان د کال ۵ میلیارد لیتره شراب څښي، چې د دې شرابو تر ۴۰ سلنې یې په ناقانونه توګه تولیدیږي او د بدل والي احتمال یې زیات دی.