سپورټ کورنی کرکټ نړیوال کرکټ

کرکیټ؛ د افغانستان غوره لیګ یا APL د دوهم ځل لپاره ترسره کیږي.

د افغانستان کرکیټ بورډ خبر ورکوي، چي د افغانستان شل اوریز غوره لیګ یا APL به د دوهم ځل لپاره پیل سي.

د کرکیټ بورډ لخوا په خپاره سوي، خبر کي راغلي چي دا لیګ به د روان عیسوي کال د اکتوبر په میاشت کي پیل سي.

په خبر کي راغلي چي په لیګ کي به د مخکي په څېر پنځه لوبډلي او ترمنځ به یې ۲۴ لوبي وي، خو د ځای په اړه یې معلومات نه دي وړاندي کړي.

کرکیټ بورډ د افغانستان غوره لیګ د دوهم ځل د ترسره کولو لپاره هند انتخاب کړی وو، خو څه موده مخکي هند ددې لیګ د کوربتوب څخه ډډه وکړه.

د افغان کرکیټ غوره لیګ لومړی فصل په عربي اماراتو کي ترسره سو.

په یاد لیګ کي د کابل، کندهار، ننګرهار، مزار او پکتیا لوبډلي شاملي وې.

ددې لیګ لومړۍ اتلولي هم د محمدنبي په لوبډلمشرۍ د مزاري لوبډلي د راشدخان په لوبډلمشرۍ د پکتیا د لوبډلي څخه وګټل.

مخکنی لومړی لیګ په عربي اماراتو کي په ښه ډول ترسره سو، چي په زیات شمېر نړیوالو مشهورو لوبغاړو هم برخه پکښي واخیستل.

په تېر لومړي لیګ کي افغان تماشاچیان هم په زیاته اندازه وه او د یاد لیګ پر مهال یې زیاتي خوښۍ څرګندولې.

د یادوني وړ ده، چي څو ورځي وړاندي کرکیټ بورډ په هیواد کي د شپږیزي کرکیټ شل اوریز لیګ د بیا پیلېدو خبر هم ورکړی وو.

کرکیټ بورډ ویلي وه، چي ددې لیګ شپږم فصل به د شپږو لوبډلو ترمنځ د روان کال د اګسټ په میاشت کي پیل سي.

 

د لیکوال/ لیکوالې په اړه

فضل الله فضلي

په کندهار کي د یاران ویب پاڼي لیکوال او ژورنالیست.