کلتور او هنر مخکښان

علي بابا خان؛ هغه هنرمن چې سندرې ته یې ټوپک خرڅ کړ!

لیکنه: ياران

لیکنه: بشیر درویش

علي بابا خان په پښتو موسیقۍ کې نوی، خو انقلاب راوړونکی سندرغاړی دی.

د پښتونخوا په چارسده کې زیږیدلی دا هنرمن د عدم تشدد د سترلاروي پاچا خان د فکر لاروی دی.

علي بابا له لوی اختر نه مخکې شمشاد تلویزون کابل ته بللی و، ده هلته د پښتو موسیقۍ په تاریخ کې په لومړي ځل د صوفیانه سندرو کنسرټ وړاندې کړ.

د علي بابا دې کنسرټ ته د لوړې موسیقۍ ډېری داسې خوښونکي، چې د سیاست، ادبیاتو او فرهنګ مطرحې څېرې وې ورغلي وو.

ځينو ګډونوالو ویل، چې د علي بابا هنر په لومړي ځل یوه کنسرټ ته په تګ اړویستي.

د سندرې لپاره یې ټوپک خرڅ کړ!
علي بابا خان له یاران وېب پاڼې سره په مرکه کې موسیقۍ ته د مخ اړولو اصلي دلیل یې دا وښود، چې غواړي په دې وسیله پښتانه ویښ او په سیمه کې د امن انقلاب راولي.

علي بابا خان وایي: موسیقۍ ته مې په ۲۰۱۳ کې مخه شوه، د پوهنتون محصل وم، د لومړۍ سندرې د ثبت او ویډیو پیسې راسره نه وې، د ټول ژوند سرمایه مې یو ټوپک او یو لیپ ټاپ و، له اوږده فکر وروسته مې لیپ ټاپ د زده کړې لپاره وساته او ټوپک مې خرڅ کړ څو د سندرې د ثبت او ویډیو پیسې پيدا شي.

علي بابا عدم تشدد نظریه او د امن راوستو لپاره فکري ویښتیا د خپل ژوند مهمې موخې ګڼي.

دی باور لري، چې په سندرو به پښتانه له جګړې راګرځوي، د نوي ژوند فکراو لاره به ورښيي او د یوه لوی انقلاب زمینه سازي به کوي.

علي بابا انجینر او سوداګر هم دی!
علي بابا د بریښنایي او مخابراتي انجینرۍ په برخو کې لوړې زده کړې لري. ده په دې برخو کې د ماسټرۍ تر کچې لوړې زده کړې کړي او اوس پکې د دوکتورا درسونه وایي.

هغه له دې وراخوا د سوداګرۍ فعال هم دی، وایي سوداګري د دې لپاره کوي، چې د ډېرو پیسو څښتن شي او دا پیسې د خپل ارمان او هنر لپاره ولګوي.

علي بابا موسیقي د پیسو ګټلو وسیله نه ګڼي، وایي نه ده په کار چې موسیقي د پیسو لپاره عام ذوق ته راټیټ او خپل ارزښت وبایلي.

ده یاران وېب پاڼې ته وویل، چې دی به د نورو ګڼو سندرغاړو برعکس پرموسیقۍ پیسې نه ګټي؛ بلکې پیسې به پرې مصرفوي، څو معیاري، انقلابي او نړیواله یې کړي.

د علي بابا سندرې
علي بابا لکه چې وویل شول په پښتو موسیقۍ کې د صوفي سندرو لومړنی ځانګړی هنرمند دی، خو یوازې یې له دې برخې سره ځان محدود کړی نه دی.

خو بیا هم دوزخي یم؛

هغه روماني، انقلابي او نورې سندرې هم وایي، خو ټینګار یې دا دی چې هره سندره باید نوې موسیقي او خوند ولري.

د علي بابا په وینا د ده هره سندره به له دې ځانګړنو برخمنه وي.

د پښتو دغه هنرمن سربېره پردې چې د سندرو لپاره لوړه شاعري انتخابوي؛ په ښه کمپوز جوړولو او د هنري ټیم په مدیریت کولو کې هم نوم لري.

علي بابا تراوسه د سندرو درې البمونه لري. (خو بیا هم دوزخي یمه)، (روح د پاچاخان یمه)، (بابا عبدالرحمان) او په تازه ګام کې ( حوره) د هغه مشهورې سندرې دي.

د علي بابا ګیتار غږول هم زده دي، دی پردې کار کوي چې پښتو موسیقي د امریکا او اروپا د موسیقۍ له نویو سبکونو سره ونښلوي. هغه د ځینو دغو سبکونو په یادولو سره وایي، چې په پښتو موسیقۍ کې لومړنۍ سندرې ده ورسره غبرګې کړي او لا به دې کار ته دوام ورکړي.

د خوښې شاعران او سندرغاړي
غني خان، عبدالرحمان بابا او ځوان شاعر بخت زاده دانش د علي بابا د خوښې شاعران دي. په سندرغاړو کې هغه د احمد ظاهر، هارون باچا، علي عظمت او لتا منګیشکر د خوښې سندرغاړي دي.

هغه په ټوله کې له پښتو موسیقۍ څخه ناراضه دی، وایي د مینې پرځای د جګړې روحیه زیاته وېشي، هغه څه چې د موسیقۍ په شان بامسولیته هنرسره نه ښايي.

نوې سندره، د جنت حوره؛

علي بابا خان له موسیقۍ څخه د مینې خورولو لپاره په کار اخیستو ټینګار کوي. دی وایي که هنرمندان په بامسولیته ډول د خپلې ټولنې فکري رهبري وکړي د انقلاب خوبونه ریښتیا کیدای شي.

په هر کور کې د یوه سندرغاړي هیله من
علي بابا خان هیله من دی، چې د پښتنو په هر کور کې یو سندرغاړی پيدا شي. د ده په وینا بې موسیقۍ ژبه او قوم مري، ځکه خو د سندرغاړو د زیاتیدو ارماني دی.

د سندرغاړو په زیاتیدو کې دی خپله لویه ګټه دا ګڼي، چې لا زیاتې سیالۍ او ښه کار ته به مجبور او غوره موسیقۍ به وکړي.

د لیکوال/ لیکوالې په اړه

ياران