سپورټ کورنی کرکټ

د انګلستان په بلاسټ سیالیو کې بوخت افغان لوبغاړي له لوبډلې سره یو ځای شوي

 د افغانستان د کرکټ ملي لوبډلې درې پیاوړي لوبغاړي محمد نبي عیسی خیل، راشد خان او مجیب ځدران د افغان کرکټ ملي لوبډلې سره یو ځای شوي دي.

دغه درې لوبغاړ نږدې دوه میاشتې وړاندې د انګلستان په کورنیو بلاسټ ۲۰ اوریزه کرکټ تجارتي سیالیو کې د ګډون په موخه انګلستان تللي و، چې اوس بيرته د خپلې کرکټ ملي لوبډلې سره یو ځای شوي دي، خو څلورم لوبغاړی ظاهر خان لا هم په انګلستان کې دی. 

د معلوماتو له مخې دغې افغان لوبغاړو د افغانستان د کرکټ ملي لوبډلې د ایرلینډ خلاف د سیالیو لپاره په انګلستان کې لوبې پای ته رسولې دي او د ایرلینډ خلاف په رسمي سیالیو کې به د افغان لوبډلې لپاره ولوبیږي. 

نن د افغانستان او ایرلینډ د کرکټ ملي لوبډلو ترمنځ د ۶ لوبو سلسله پیلیږي، چې لمړۍ درې لوبې یې ۲۰ اوریزه او وروستۍ درې یې ۵۰ اوریزه دي. 

د افغانستان د کرکټ ملي لوبډله د ایرلینډ خلاف دغه سیالیو ته د لا ښه چمتوالي او تمریناتو په موخه لمړی انګلستان ته تللې وه او د تمریناتو پرمهال یې د سر پال ګیټي لوبډلې ته، چې پکې د انګلستان، سکاټلینډ او یو شمیر نورو لوبډلو لوبغاړو برخه اخیستې وه؛ ماته ورکړه. 

افغان لوبډله اوس ایرلینډ ته رسیدلې ده او نن شپه به د ایرلینډ خلاف په لمړۍ ۲۰ اوریزه سیالۍ کې بخت وازمايي.

سیالي د افغانستان پر وخت د ماښآم په ۷ نیمو بجو سره پیل کیږي، چې په ژوندی بڼه به هم خپره شي، خو په افغانستان کې یې تر اوسه د رسمي خپریدو څرک نه لګي. 

د ایرلینډ کرکټ بورډ د معلوماتو له مخې دغه لوبه به د ایرلینډ ترڅنګ د اسټرالیا، نیوزیلنډ او انګلستان تلویزیوني شبکو لخوا په ۱۵۰ هېوادونو کې نشر شي، خو تر دې مهاله په افغانستان کې د کوم تلویزیون سره هوکړې ته نه دي رسیدلي.

د لیکوال/ لیکوالې په اړه

احسان الله ساپی