د ۲۰۱۸ کال غوره ۱۰ کتابونه

ژباړه: محمد عزيز پردېس

د امريکا متحده ايالتونو نيويارک ټايمز ورځپاڼې څو ورځې وړاندې د ۲۰۱۸ کال ۱۰ غوره کتابونو لېست خپور کړ چې په دې کتابونو کې داستاني او غير داستاني کتابونه شامل دي.
د نيويارک ټايمز مشران هر کال د لسو غوره کتابونو لېست خپروي چې په دې کې پنځه داستاني او پنځه غير داستاني شامل وي.
هغه کتابونه چې د نيويارک ټايمز ورځپاڼې په ۱۰غوره کتابونو کې شامل کړي دي په لاندې ډول دي:

Asymmetry: د ليزا هاليډي په قلم ليکل شوی رومان دی چې يو له هغو کتابونو څخه دی چې ليکوالان يې مجرب او مسلکي دي. هاليډي په دوو برخو کې د ( ناپوهۍ ) او ( لېونتوب ) تر عنوانونو لاندې يوه مينه ييزه کيسه او پکې د يو عراقي – امريکايي اقتصاد پوه ماجرا چې د لندن په هيثرو هوايي ډګر کې نيول کېږي، بيان کړې ده.

The Great Believers: ياد کتاب د ربکا ميخايل په قلم لیکل شوی دی. په دې کتاب کې د د شيکاګو او پاريس څو جريانات چې په ۱۹۸۰ او ۲۰۱۵ کلونو کې د ترهګريزو حملو په ترڅ کې رامنځ ته شوي، د ( سل کلن کور ) تر عنوان لاندې د يو په زړه رومان په بڼه بيان شوي دي.

The Perfect Nanny: هغه کتاب چې د ليلا سليماني په ښکلي قلم کښل شوی دی. ياد کتاب د فرانسې د ( ګنکور ) ادبي معتبره جايزه ترلاسه کړې ده. کتاب د هغه مينه ناک پرستار يا ساتونکي داستان بيانوي چې لاسونه يې د دوو ماشومانو په وينو سره دي.

There There: ټامي اورنج د دې کتاب ليکونکی دی. لومړنی کتاب چې په خپل داستان کې يې همهاله وخت، بې وزلۍ او ښاري ژوند ته ځای ورکړی دی. د دې کتاب ډېری لنډ لنډ څپرکي د امريکا د بوميانو د ډله ييزې ژبې څخه روايت کوي چې په اوکلنډ کې اوسي.

Washington Black: کتاب د کاناډايي رنګين پوسته رومان ليکونکي ايسي اوډګان درېيم کتاب دی چې د ګيلر معتبرې جايزې ګټونکی شوی او د من بوکر معتبرې جايزې لپاره هم نوماند دی. اوډګان په خپل کتاب کې د غلامۍ يا برده داری څخه د جورج واشنګټن بلک د تېښتې ماجرا بيانوي. نوموړی په دې کتاب کې د غلام لرونکي د سپين پوستي د ورور هغه په زړه پورې داستان بيانوي چې څنګه د تورپوستي سره يې اړيکې ټينګېږي.

American Prison: د دې کتاب ليکوال شي بائر دی. د دې کتاب ليکوال په ۲۰۱۴ کال کې د لوزيانا يوې کليوالې سيمې ته لاړ، ترڅو په مبدل لباس کې د وين په نامه يو خصوصي زندان کې کار وکړي. که څه هم هغه له څلورو مياشتو څخه وروسته له هغه ځايه لاړ، خو په دې څلورو مياشتو کې يې د امريکايي زندانونو د وضعيت په اړه ډېر څه لاسته رواړل او دې ته اړ شو چې دا کتاب وليکي.

Educated: ټارا وسټ اور د دې کتاب ليکوال دی. د شجاعت او پرځان باورۍ په اړه د ليکوال د خاطرو په زړه پورې او خوندور کتاب. ټارا د کورنۍ د کوچني اولاد په توګه حتی د پيدايښت نېټه يې نه وه معلومه او د پوهنتون د درس څخه مخکې هېڅکله هم ښوونځي ته ندی تللی. هغه چې د زده کړو تږی و، په کور کې يې ليک او لوست زده کړ او دمګړی په کيمبريج پوهنتون کې د تاريخ په برخه کې زده کړه کوي.

Frederick Douglass: ډيوېډ ډابليو بلايټ د ياد کتاب ليکونکی دی. تلپاتې اثر په يوې تلپاتې څېره کې. په نوموړي کتاب کې د ډاګلاس شخصي او عمومي ژوند په ښه او څرګند ډول تصوير شوی دی.

How to Change Your Mind: ياد اثر د مايکل پولن دی. د کتاب ليکوال ډېری د خوراکي توکو د اخلاقو پر ليکلو مشهور دی. د ياد کتاب موضوعات د روغتيايي توکو او موادو په اړه راڅرخي، چې پکې د درملو ګټې او تاوانونه څېړل شوي دي.

Small Fry: ليزا برنان جابز د دې کتاب ليکونکی دی. ليزا په دوو متفاوتو حالتونو کې لوی شوی؛ مور يې يوه فقيره هنرمنده او پلار يې سټيو جابز يو کلک زړی شتمن.


هغه په دې کتاب کې د خپل پلار او مور ( دوه متفاوتې نړۍ ) داستانونه په غوره توګه بيان کړي دي. هغه په دې کتاب کې د خپل پلار متفاوت تصوير نړيوالو ته څرګند کړی دی، هغه تصوير چې ټول خلک يې په مهربانۍ او سخاوت پېژني.

About محمد عزیز پردیس 278 Articles
محمد عزیز پردېس منځنۍ زده کړې د کندز په حضرت علي لېسه کې او لوړې زده کړې يې د کندز پوهنتون د ښوونې او روزنې پوهنځي په پښتو ځانګه کې کړي دي. نوموړی دمګړی له يو خصوصي انستيتوت سره د ژباړې په برخه کې بوخت دی. د ياران وېبسايټ څخه يې هر اړخيزې ليکنې او ژباړې لوستلی شئ. په یاران کې د عزیز پردیس د خپرو شویو لیکنو د بیا خپراوي حق یوازې له یاران سره خوندي دی