اقتصاد نړۍ

د نړۍ لس ځوان میلیاردران، چې عمرونه يې له ۲۰ تر ۳۰ کلونو دي

لیکنه: شریف شاهین
اعلان

په نړۍ کې د ځوانو میلیاردرو کچه په لوړیدو ده. ځینو ته له پلاره پاتې دي، ځینو يې د ټیکنالوژۍ نوي سیستمونه او پروګرامونه جوړ کړي، او ځینو نورو بیا په خپل محنت یو کوچنی کاروبار تر میلیاردونو ګټې رسولی.

د فوربیز مجلې د ۲۰۱۸ کال د وروستیو معلوماتو په اساس، په نړۍ کې د ۴۰ کلنې څخه کم عمره یا Under40 میلیاردران تر ۶۳ اوړي. په دوی کې ټاپ لس ځوان میلیارداران له ۲۲ تر ۳۱ کلونو پورې عمرونه لري.

د ۲۰۱۸ کال د نړۍ تر ټولو لس ځوان میلیاردران:

۱ـ الکساندرا انډرسن – ۲۲ کلنه


نوموړې د ناروې هیواد ده. هغه په ۱۹۹۶ کال کې زیږیدلې او اوس تر یو نیم میلیارد ډالرو خالصه پانګه لري. انډرسن د نړۍ تر ټولو ځوانه میلیاردره ده. د نوموړې پلار د فیرد په نوم کمپنۍ لري، چې وروسته يې خپلې دواړه لورګانې هم ورشریکې کړي. اوس دواړه میلیاردرانې دي.

۲ـ کترینا انډرسن – ۲۳ کلنه


نوموړې ۲۳ کلنه ده او الکساندر انډرسن خور ده. نوموړې هم میلیاردره ده او سرمایه يې سره مساوي ده. دواړه تر یو نیم – یو نیم میلیارد ډالرو پیسې لري.

۳ـ ګاستو مګنر ویتزو – ۲۵ کلن

وموړی هم د ناروې دی. هغه د ماهیانو د تولید د یوې سترې کمپنۍ (سالمار) شریکباڼی او مشر دی. ویتزو ۲۵ کلن دی او څه کم دوه میلیارده سرمایه لري.

۴ـ ایوان شپيګل – ۲۸ کلن


نوموړی د (سنپ ان سي) کمپنۍ مشر او شریک دی. سنپ ان سي کمپنۍ د کېمرې لویه کمپنۍ ده، چې د سنپ چټ په نوم د دوستانو تر مینځ د تصویري خبرو زمینه برابروي. نوموړي په سټانډ فورډ پوهنتون کې د تولید د ډیزاین په برخه کې زده کړې کړي اوس تر څلور میلیارد ډالرو زیاته سرمایه لري.

۵ـ لډویګ تیوډور بران – ۲۸ کلن


نوموړی د طبي سامان الاتو د یوې لوې کمپنۍ ۱۰ سلنه شریک دی، چې اوس يې خالصه پانګه تر دوه میلیارده ډالر (۱.۷) ته رسي. نوموړی د نړۍ پینځم ځوان میلیاردر دی.

۶ـ جان کولیسن – ۲۸ کلن
نوموړی ایرلینډی ځوان میلیاردر دی، چې د سټریپ په نوم د تجارتي او بانکي سافټ ویر جوړولو کمپنۍ شریک دی. په دې کمپنۍ تر ۲۰ میلیارد ډالرو پانګونه شوې.

جان کولیسن او پاټریک کولیس، دواړه ورونه دي

۷ـ پاټریک کولیسن – ۳۰ کلن
د جان ورور دی او د سټریپ کمپنۍ اجرائیوي مشر او شریک دی. دوی دواړه ورونه تر یو – یو میلیارد ډالرو حالصه سرمایه لري.

۸ـ بابي مرفي – ۳۰ کلن


نوموړی څه باندې ۴ میلیارده ډالره خالصه سرمایه لري. هغه د شپيګل سره شریک او د (سنپ ان سي) کمپنۍ بنسټ ګر دی. نوموړي په ریاضي او محاسبه کې لوړې زده کړې کړي.

۹ـ وانګ هان – ۳۰ کلن


نوموړی د چین هیواد ځوان میلیاردر دی او په شانګهای کې د جینو ایر په نوم د یو لوی هوايي شرکت څښتن دی. نوموړي ته څه د پلار سرمایه هم پاتې ده او څه يې خپله ګټلې. اوس ۱.۲ میلیارد ډالره خالصه پانګه لري.

۱۰ـ ایوا ماریا برن


نوموړې د پیچکاریو او طبي جراحي سامان الاتو د یوې لوې کمپنۍ شریکه ده. خالصه سرمایه يې تر ۲ میلیارد ډالرو اوړي.

د لیکوال/ لیکوالې په اړه

شریف شاهین