healthy-living

د ښه ژوند ۱۳ لارې

لیکوال: جیم روهن

ژباړه : همیانۍ

په ۱۹۶۰ زږدیز کال کې د پوهانو له نظره دا ناشونې وه چې یو کس دې په فضا کې ګام کېږدي، خو یوازې په لسو کالو کې دا حقیقت بدل شو، که خبره را وسپړو دا حقیقت نه و خلکو له بې وسۍ خپلې دغې کمزورۍ ته د حقیقت له عینکو کتل، یوازې په لسو کلونو کې انسان پر سپوږمۍ پښه کېښوده، دا هر څه له یوې ننګونې پیل شول، کله چې د امریکا په علمي ټولنو کې د پلټنې یو زړی د شنه کېدو لپاره وکرل شو او دوی په دې لټه کې شول چې له نړۍ بهر ووزي او خپلې علمي پلټنې پراخې کړي، دوی ځان ته موخه وټاکله چې یوازې به لسو کالو کې به هرو مرو انسان پر سپوږمۍ کام اېږدي. دوی یوازې غوښتل یو خیال په حقیقت بدل کړي.

تاسې تر اوسه فکر کړی چې یو بېوزله شتمن کېدلی شي؟ زما ځواب هو دی، خو یوازې په پلان جوړولو، فکر کولو، هڅه، دوامداره کار او نورې اړوند کارونه هغه سحر او جادو دی چې کولی شي ستاسې ژوند بدل کړي. خو ځېنې خلک وايي چې دا فورملونه به د بریا لپاره کار وکړي؟ دا پوښتنه سمه نه ده دا پوښتنه باید داسې وشي چې، یو کس کولی شي له دغې پلان او فورمل نه کار واخلي؟ زما موخه دا ده چې خبره په فورمل کې نه د خبره په فرد کې ده چې هغه کولی شي له ټاکلو فورملونو او لیکنو ګټه واخلي که نه؟ د فورملونو او ځينې پلانونو نه عملي کول هغه ستونزه ده چې ښايي ډېر کسان ورسره مخ وي.

موږ کولی شو هر هغه لوري ته چې وغواړو ولاړ شو، زموږ پښې زموږ په واک کې دي، او لاره پټه خوله زموږ تر پښو لاندې پرته ده، خو یوه خبره مه هېروئ چې په لومړي ځل روانېدل زړورتیا غواړي هغه په سم لوري روانېدلی شي چې د ګام ءوته کولو زړورتیا پکې وي.

که غواړئ چې ژوند مو ښه شي نو لاندې دیارلس لارې چارې عملي کړئ.

۱. د ډار او وهم څېره مو ورکه کړئ

ډیر خلک چې له ما سره خبرې کوي د خپلې ماتې یو علت ډار بولي، دوی وايي یو څه مې سترګو ته ولاړ دي ما نه پرېږدي چې مخ ته ولاړ شم، هېڅ نشته یوازې یو ډار د دوی په زړه کې دی، زه نه حیرانېږم ځکه له یوې مرحلې بلې ته تګ ډار لري. تاسې خپل هر ډول ډار همدا نن ورک کړئ همدا نن مو ټول ډارونه او هغه څېره چې ډارنه ده لرې کړئ.

۲. د تمرین له لارې ځان پياوړی کړئ

که د تېرو شپږو کلونو کارونو تاسې ته ګټه نه ده رسولې هغه کارونه نور پرېږدئ، په یوه نوي پلان فکر وکړئ، ځان ته یوه نوې لاره وټاکئ او پر هغه لاره روان شئ، تاسې د خپل واک یئ یو نوی ژوند درته جوړولی شئ. د تېر کال کارونه او عادتونه سږ کال مه تکراروئ ځان ته نوي عادتونه پیدا کړئ چې کولی شي تاسې ته ګټه ورسوي، د راتلونکې په اړه فکر وکړئ او په اوس کې ژوند وکړئ. دا د یوې ورځې خبره نه ده تمرین او کوښښ ته اړتیا لرئ څو مو ژوند بدل کړئ او د ناوړه عادتونو پر ځای ښه او ګټور عادتونوه خپل کړئ.

۳. خپلې تېروتنې و منئ

خپلې تېروتنئ ومنئ. ځان وبښئ یوازې ځان ته ووایئ ما وبښه، تېروتنه مې وکړه، د خپلې تېروتنې تر شا نور خلک ګرم مه بولئ، یوازې همدا چې خپله تېروتنه مو ومنله کولی شئ نوی ژوند پیل کړئ. تاسې اړ نه یی چې هر چا ته هر څه ووایئ یا خپلې تېروتنې د نورو له امله وبولئ یوازې خپله تېروتنه ومنئ او نوی ژوند پيل کړئ، که دا کار و نه کړئ او خپلې تېروتنې و نه منئ نو پوه شئ چې بیا به تېروتنه وکړئ او هغه تېروتنه به تر دې ستره وي.

۴. پر خپلو موخو له سره کتنه وکړئ

پر خپلو موخو وخت پر وخت یوه کتنه کوئ، کوښښ وکړئ چئ موخې مو وخت پر وخت لوړې کړئ، کله کله مو ځينې موخې را ټېټې کړئ، خو کله چې ستاسې وړتیا لوړه وي خو موخې مو ټېټې ټاکلې وي نو کولی شئ چې په هغه کې ادلون بدلون راولئ.
۵. پر ځان باور ولرئ

تاسې باید پر خپلو وړتیاوو باوري وئ. پر دې باور چې سبا ورځ به هرو مرو تر نن ورځې ښه وي، ډېر مرستندوی واقع کېږي.

پر ځان باور ولرئ او خپل ژوند بدل کړئ. دا داسې کوم مهارت نه دی چې زه یې تاسې ته در زده کړم، یوازې ځینې کړنلارې دي چې که هغه عملي کړئ نو پر ځان باور زیات شي او دا کړنلارې ستاسې په وجود کې دي. په دې اړه کتابونه شته، سیمنارونه ورکول کېږي تاسې هم ګډون په کې وکړئ. هره لاره چې ښه درته برېښي عملي یې کړئ؛ خو یوازې پر ځان مو باور ډېر کړئ.

۶.عاقلانه پوښتنه کوئ

یوازې د عقل او پوهې پر بنسټ پوښتنه کوئ او د پوښتنې له کولو به مو هم موخه دا وي چې پوهه مو لوړه شي. د دې لپاره پوښتنه مه کوئ چې نور وننګوئ، د دې لپاره پوښتنه کوئ چې څه مو زده شي، پوښتنه کولی شي له تاسې سره په ډېرو برخو کې مرسته وکړي. یوه بله خبره چې باید په یاد یې ولرئ هغه دا ده چې د عقل پوښتنو ته مو هم ځواب ووایی غوږ ورته ونیسئ چې هغه څه وایي.

۷. د عمر په اړه مو رښتني اوسئ

ځينې وخت خپل عمر جعلي ښیو. دغه دې سبب کېږي چې له ډېرو باورونو او نوښتونو لاس واخلو. موږ دا وایو چې عمر مې کم دی کولی شم بل وخت دغه کار وکړم یا وایو چې اوس د دې عمر نه دی چې زه د ژوند لپاره نوي پلانونه جوړ کړم. د خپل عمر په اړه رښتني واوسئ دې ته مو پام وي چې عمر څنګه تېرېږي هېڅکله ځان ته په دې اړه د دروغو قناعت مه ورکوئ.

۸. له خپلې پانګې ګټه پورته کړئ

ګورئ زه دلته یوه فلسفي خبره کوم، یوه روپۍ ګټه تر هغو زرو روپیو ښه ده چې ستاسې په جېب کې پرتې دي، نو کوښښ وکړئ چې له خپلې پانګې ګټه پورته کړئ، هر څومره شته او پانګه که ولرئ خو چې ګټه ترې وا نخلئ ستاسې لپاره په نشت شمار ده، خپلې پیسې په کار واچوئ او ګټه ترې پورته کړئ.

۹. قوي ژوند وکړئ

کوښښ وکړئ یوه ځانګړې انرژي ولرئ. ښايي ډېر کله مو د پانګونې لپاره هڅه کړې وي خو داسې وخت راغلی وي چې زړه مو سوړ شوی وي، هېڅ کله د خپل زړه شور او قوت مه بایلئ، تاسې کولی شئ په دې توګه قوي، عاقلانه او ښکلی ژوند ولرئ تاسې کولی شئ ځان خوشاله وساتئ په دې توګه به مو ژوند له خوښیو ډک وي خو همدا چې خپل شور او قدرت مو بایلود بیا نو له ژونده خوند نشئ اخیستئ او ژوند مو نه بدلېږي.

۱۰. خپل ځای پیدا کړئ

د دې لپاره چې ښه کار وکړئ او له هغه لارې ډېره ګټه تر لاسه کړئ نو اړ یاست چې ښه ځای پیدا کړئ، تل کوښښ کوئ چې خپل رښتنی ځای پیدا کړئ په داسې ځای کې دنده تر سره کوئ چې نه ستاسې تر وړتیا لوړ وي او نه ټيټ که داسې وشي له کار سره به ښه چلېږئ او ژوند به درته په زړه پورې وي، خو که مو کار تر وړتیا لوړ وي بیا هم مخ ته نشئ تللی او که ټيټ وي بیا هم دا خبره سمه ده.

۱۱. له ځان سره صادق و اوسئ

له ځان سره صداقت هغه څه دي چې له خپل وجود او وړتیا سره ستاسې وفا ښيي، صداقت داسې څه نه دي چې تاسې یې له بل چا وغواړئ، یوازې له ځان سره صداقت وکړئ باور ولرئ چې ستاسې شاوخوا ملګري به هم درسره صادق وي، له ځان سره په خپلو ټولو کارونو کې رښتینولي مه هېروئ.

۱۲. نظم ته ښه راغلئ

زه نه شم کولی د نظم په اړه تاسې ته نور څه ووایم، یوازې دومره ویلی شم چې نظم هغه څه دی چې ښارونه جوړلی شي، له هر څه سره نظم خوند کوي او چېرې چې نظم وي او هر کار په منظم ډول تر سره شي هلته کارونه سم او ګټور وي. نظم کولی شي ستاسې ژوند او چاپېریال له خوښیو او آرامتیا ډک کړي.

۱۳. د هغه څه لپاره مبارزه وکړئ چې سم دي

هر هغه څه چې رښتیا او پر ځای درته ښکاري د دفاع لپاره یې مبارزه وکړئ، د ښې روغتیا د ساتنې لپاره مبارزه وکړئ، د خپلې شتمنئ د ساتلو لپاره مبارزه وکړئ، د خپلې کورنۍ لپاره د یوه ښه کسب لپاره مبارزه وکړئ، که غواړئ چې ځان درته پياوړئ ښکاره شي او نورو ته ارزښت ولرئ له هر څه سره مبارزه وکړئ موخه مې له هر څه هر هغه څه دي چې ستاسې د پرمختګ او ژوند په لاره کې خنډ دي.

 

ځواب دلته پرېږدئ

ستاسو برېښناليک به نه خپريږي.