سیاست

ولسمشر غني وايي د تیرې شپې راهېسې طالبانو اوربند عملي کړی

لیکنه: ياران

افغان ولسمشر محمد اشرف غني وايي، د تیرې شپې له ۱۲ بجو څخه راپدیخوا طالبانو او حکومت هغه اوربند په بشپړه توګه رعایت کړی چې دمخه تر دې یې اعلان کړی وو.

افغان حکومت د روژې له اووه ویشتمې د اختر تر پنځمې نیټې پورې د اوربند اعلان کړی خو وسلوالو طالبانو بیا ویلي چې د اختر په درې ورځو کې به د حکومتي ځواکونو خلاف اوربند کوي.

ولسمشر غني چې نن یې د اختر له لمانځه وروسته په ارګ کې راټولو شویو خلکو ته خبرې کولې په دې اړه وویل: موږ د هر هغه اقدام هرکلی کوو چې د وینې د بهیدو مخنیوی کوي.

ولسمشر غني د اختر په ورځو کې د وسلوالو طالبانو له خوا د اوربند اعلان یو ښه اقدام وباله او هیله یې څرګنده کړه چې دا اوربند به دوام پیدا کړي او نور به د چا وینه نه توییږي.

نوموړې د عامو افغانانو هغو غوښتنو ته هم اشاره وکړه چې د دواړو خواوو ترمنځ د اوسني اوربند غزیدل غواړي. اشرف غني په ننګرهار کې د اوربند په پلوۍ د ښځو لاریون، له هلمند څخه کابل ته د مدني فعالانو د سولې لاریون او د دیني عالمانو غوښتنې یادې کړې.

نوموړې د طالبانو په مشرتابه یو واربیا غږ وکړ چې د سولې دې غوښتنو ته مثبت ځواب ووايي، او په افغانستان کې د یوې دایمي سولې د ټینګښت لپاره رامخکې شي.

طالبانو د اختر په درې ورځو کې د حکومتي ځواکونو خلاف د بریدونو د ودریدو خبره کړې، خو تر اوسه پورې یې پرلپسې د افغان حکومت سره د سولې خبرو ته د کیناستو خبره رده کړې ده.

د لیکوال/ لیکوالې په اړه

ياران