سیاست

نیکې هیلي وايي، ټرمپ سره د یارانې تهمت خپه کړې یم

لیکنه: شریف شاهین

ملګرو ملتونو کې د متحده ایالاتو ځانګړې استازې نیکې هیلي وايي، چې د ولسمشر ډونالډ ټرمپ سره شخصي اړیکو او یارانې تور پرې بې اساسه لګیدلی. هغه وايي، دا ډول تهمتونه سپکوونکي او خواشینوونکې دي.
په نیکې هیلې د ولسمشر ټرمپ سره د یارانې تور د “اور غوصه: ټرمپ د سپینې ماڼې د ننه” کتاب لیکوال میخایل ولف لګولی دی.

د کتاب لیکوال په خپل کتاب کې لیکي، چې نیکي هیلي د ولسمشر ټرمپ خوښیږي؛ هغې کې یې همیشه دوه سترګې ګنډلې وي او خپل زیات وخت نیکي هیلي ته ورکوي.

ټرمپ، نیکي هیلي او نور امریکايي چارواکي

نیکي هیلي چې د امریکا وتلې سیاستمداره ده، مور او پلار يې اصلا د هندوستان دي، چې بیا وروسته امریکې ته تللي او هملته استوګن شوي.

لیکوال ادعا کوي، چې ډونالډ ټرمپ د نیکې هیلې سره د هغې په سیاسي مستقبل کې هم مرسته کړې ده.
هیلي په خپلو وروستیو څرګندونو کې چې تیره پنجشنبه يې د “د سیاسي ښځو د واکمنۍ” په نوم انټیرنیټي خپرونه کې کولې، وویل، چې په والف له لورې په دې لګیدلي تورونه بې اساسه، سپکوونکې او خواشینوونکي دي.

هغې وویل:
“زه یو وخت په [هوايي ځواک اول] اطاق کې وم؛ خو زه هلته یوازې نه وم. هلته نور هم ډير خلک وه. زه ولسمشر ټرمپ سره اوس هم په سپینه ماڼۍ کې د هغه په دفتر کې د خپل سیاسي راتلونکې په اړه خبرې کوم؛ خو ما هیڅکله هم د ولسمشر سره د خپل شخصي راتلونکې په اړه خبرې نه دې کړي او نه هم زه له هغه سره یواځې په خونه کې د ننه شوې یم.”
میرمن هیلي وویل، چې ځينې واړه خلک ددې په څير لوې سیاستمدارې میرمنې نشي زغملای، نو ځکه پرې دا ډول بې اساسه تهمتونه لګوي.

ولسمشر ټرمپ د ستړې مه شې پرمهال، نیکي هیلي ښکلوي

هغه زیاتوي:
“زیات شمیر نارینه ښځو ته احترام لري؛ خو یوه کوچنۍ ډله خلک شته، چې خپل کار ته ژمنې، بریالۍ او زروړې میرمنې نشي زغملای او د هغوی په وړاندې نفرت ښيي. او دوی ستاسې د کمزوري کولو همدا یواځینې لار بولی.”
ښاغلي والف د ټرمپ د ادارې په اړه د اور او غوصې په نوم کتاب تازه خپور کړی، چې تر اوسه ۱.۷ میلونه ټوکه پلورل شوی دی.

نیکي هیلي ۴۵ کلنه ده، په ۱۹۹۶ کال کې يې د میخایل هیلي سره واده وکړ. د هغې خاوند یو پوځې افسر دی او په ۲۰۱۳ کال کې د یوه کال لپاره افغانستان ته په ماموریت هم راغلی و. دوی دواړه دوه ماشومان – یو ځوی او یوه لور لري.
نیکي هیلي په ملګرو ملتونو کې د امریکا استازې ده. هغه د ولسمشر ټرمپ د زیاتو پریکړو سره موافقه ده او د شمالي کوریا په مسایلو کې د ټرمپ کلکه ملاتړې ده.

د لیکوال/ لیکوالې په اړه

شریف شاهین