ژوند بڼه کلتور او هنر

څنګه کاري چلند او شخصیت ولرئ؟!

یاران اپ په ګوګل پلی سټور کې یاران په ګوګل پلی سټور کې

یاران اپ په ایفون اپ سټور کې  یاران په ایفون اپ سټور کې 

شخصیت او مسلکي چلند یوتربله لازم او ملزوم دي. مسلکي چلند د انسان د شخصیت یوه برخه دی. هرکس په خپل ژوند، سلوکو او چلند کې ځانګړې تګلارې لري او په همغو پېژندل کیږي. لکه یو محصول او شرکت، چې د هغوی له برانډه پېژندل کیږي. انسان هم د خپل ځان د تشهیر لپاره د چلند ځانګړی برانډ لري.

کرزی په چپنه او قره قولۍ له لرې پېژندل کیږي. د غونډې په هرکونج کې ، چې ناست وي، خلک یې پېژني. په نړۍ کې یې هم خلک له ورایه پېژني. همدا، چې سترګې پرې لګیږي، پوهیږي، چې کرزی دی.

په شخصي چلند او تګلارو کې اصلي شرط د هغو مثبت اړخ دی. شهرت باید ستاسې په مثبتو خویونو، او چلندونو وي. په بد چلند شهرت د ګټې پرځای زیان کوي. ولسمشر غني ډیر خاندي، یا له ځانه ډیر حرکات ښيي، خو دا ښه چلند نه دی. ډیر وخت ترې منفي تاثر اخیستل کیږي.

مسلکي چلند داسې څه نه دي، چې تاسې ته یې څوک در وښيي. دا اکتسابي او له مسلکي تجربې سره تړلی شی دی. شاعران، چې وګورې خپل ځانګړي چلندونه لري.

د متعلمۍ دوره کې سړی ډیر بې پروا وي، د محصلۍ په دوره کې یې ژوند بدلیږي او چې فارغ شي او د بچیانو او ژوند څښتن شي، په ژوند او شخصیت کې ګڼ نور تغییرات محسوسوي.

یوڅوک په لیسه کې هسې ریشخند شی وي، خو چې د پوهنتون په دوره کې یې وینئ، په شخصیت کې یې بشپړ بدلون راغلی وي. ډېر شوخ او بې ادبه کسان ډیر غلي او مودب شي او ډېر مودب او غلي شوخ او بې ادبه شي. چاپیریال د افرادو په چلنډ ټاکلونو کې مهم رول لري. په هغو چاپیریالونو کې چې انساني شخصیت مثبته وده کوي، چلند هم مثبت وي.

که یوڅوک په لاپو شاپو مشهور شي، په عمر هم څوک پرې باور نه کوي، ځکه خلکو په همدې نامه پېژندلی. لکه یو محصول، چې یوځل بې کیفیته ثابت شي، نور یې څوک نه اخلي، ولو که کیفیت یې یو پر څو لوړ هم شي. شخصیت جوړول له ماشومتوبه پیلیږي او د عمر تر پایه وده کوي. موږ او تاسې هر یو د خپل ژوند ډیره برخه په خپل مسلکي، ټولنیز، سیاسي، ادبي او …. شخصیت جوړونې لګوو.

شاعر لګیا دی، چې څنګه په ټولنه کې تر نورو ډیر مشهور او ښه شعر ولیکي.

انجنیر په خپل او دا نور د خپلو کاري او مسلکي شخصیتونو پر اکمال بوخت دي.

ډیره وړه تیروتنه ددې لامل کیږي، چې شخصیت مو وشړیږي، ځکه خو وايي، چې شخصیت جوړول که هرڅو سخت دي، خو ساتل یې تر هغه څو ځله سخت دي.

ځینې کسان د شخصیت جوړونې مصنوعي هڅې کوي، خو دا ډول هڅې په نهایت کې بې نتیجې دي.

دا لکه پوکاڼۍ، چې په هوا وپړسیږي، خو، چې هوا ترې ووځي، بیرته خپل اصلي ځای ته راشي. که څوک په پیسو شخصیت جوړوي، د غریبۍ په ورځو کې به یې څوک د خره له نرخه هم ونه غږوي. په ډیرو خبرو، ډیر کار او ډیر درناوی هم شخصیت نه جوړیږي. په کاري شخصیت جوړولو کې تر ټولو مهم څیز کاري ظرفیت او رښتینولي ده. که وړتیا ولرئ او په کار کې صادق وئ، په ټولنه او مسلکي چاپیریال کې مو خپله شخصیت تبارز کوي.

له فیسبوک تبصرې

تبصرې

د لیکوال/ لیکوالې په اړه

همیانۍ ورځپاڼه