ټولنیز ژوند روغه سټه ساینس او ټیکنالوژي له نړۍ

ساینس ثابته کړه چې لمونځ زیاتې روغتیايي ګټې لري

لیکنه: ياران

ژباړه او زیاتونه: محمد صادق کریمزی

لمونځ چې د اسلام مبارک دین دویم رکن دی او د الله ج له لورې پر مسلمانانو فرض شوی چې د بې شمېره اخروي اجرونو او ثوابونو سربیره یو شمېر دنیاوي ګټې هم لري.

همدغه لمونځ چې شااوخوا څوارلس سوه کاله وړاندې د حضرت محمد ص په وسیله خپل امت ته راوړل شوې او بدله یې په دنیا او اخرت روښانه شوې ده، خو ساینس یې د ښه وضاحت لپاره په دې وتوانیدو چې لمونځ کول کومې صحي ګټې لري.

د بریتانیا د انډیپنډنټ ورځپاڼې په خپله نوې خپره شوې څېړنه کې ویلي چې د لمانځه منظم حرکتونه کول مو د ملا له درده ژغوري.

د ورځپاڼې د راپور له مخې دغه څيړنه د نړۍ په سطحه په مختلفو نارینه او ښځینه وو ترسره شوې پایلې یې ښیي چې لمونځ کول د ملا د دردونو په کمولو کې د پام وړ رول لري.

یاد څیړونکي د مسلمانانو لمونځونو ته په اشارې سره وایي؛ د لمانځه پنځه حرکتونه لکه رکوع، سجده او نور کول مو نه یوازې د ملا له درده ژغوري بلکې د بدن ستړیا مو هم له منځه وړلی شي.

څېړونکي زیاتوي؛ رکوع کول د هغو کسانو لپاره ډيره ګټه لري چې د ملا د ښکتنۍ برخې له دردونو ډير شکایت کوي.

د دوی د معلوماتو له مخې اوسمهال شاوخوا ۱،۶ میلیارده مسلمانان هره ورځ خپلو لمونځونو کې کعبې شریفې ته مخامخ رکوع او سجدې کوي.

باید وویل شي چې لمونځ کول د اخروي ثوابونو او صحي ګټو سربیره زړه ته سکون او ارامتیا هم ورکوي. که یو مسلمان یې په قصدی ډول پریږدي، نو الله ج ورته د دنیاوي او اخروي عذابونو خبرداری هم ورکړی.

د لیکوال/ لیکوالې په اړه

ياران