سپورټ

راشد خان د چټکو ۱۰۰ ویکټو اخیستو نړیوال ریکارډ جوړ کړ

 د افغانستان د کرکټ ملي لوبډلې ځوان لوبغاړي راشد خان د ۵۰ اوریزه کرکټ سیالیو په تاریخ کې د چټکو ۱۰۰ ویکټو اخیستو ریکارډ جوړ کړ.

نوموړي د کرکټ نړیوال جام غوراوي پړاو سیالیو پای لوبه کې دغه ریکارډ د کرکټ وروستي ۲۰ وریزه نړیوال جام اتلې لوبډلې ویسټ انډیز خلاف ترلاسه کړ.

 د کرکټ نړیوال جام غوراوي پړاو سیالیو پای لوبه کې دواړه افغانستان او ویسټ انډیز د ۲۰۱۹ م کال د کرکټ نړیوال جام سیالیو ته د رسیدو وروسته مخامخ شول، چې افغان لوبغاړي راشد خان د خپل ۵۰ اوریزه کرکټ سیالیو ۴۴ مه لوبه ترسره کړه او پکې یې د لمړۍ ویکټې په اخیستو سره خپلې ۱۰۰ ویکټې پوره کړې.

 په «لیټل ګوګلي ماسټر» مشهور افغان راشد خان اوس په نړیوال کرکټ کې په دې کارنامې سره لمړي مقام ته ورسید، چې له دې وړاندې د چټکو ۱۰۰ ویکټو اخیستو ریکارډ د اسټرالوي میچل سټارک په نوم و.

اسټرالوي میچل سټارک له دې وړاندې په ۲۰۱۶ م کال کې د سریلنکا خلاف د سریلنکا کولمبو کې دغه ریکارډ په ۵۲ سیالیو کې خپل کړی و، چې له هغې وړاندې په ۵۳ سیالیو کې د پاکستاني سقلین مشتاق په نوم و.

 راشد خان د ویسټ انډیز خلاف په دې تاریخي سیالۍ کې د ویسټ انډیزي شايي هوف په سوځولو سره ۱۰۰ ویکټې واخیستې او لمړي مقام ته ورسید.

د لیکوال/ لیکوالې په اړه

احسان الله ساپی