سپورټ

د ښوونځیو ترمنځ د کرکټ ۲۰ اوریزه سیالۍ پای ته ورسیدې

د هېواد په ختیځ ننګرهار ولایت کې د ښوونځیو د زده کوونکو ترمنځ د کرکټ ۲۰ اوریزه سیالیو لړۍ پیل شوې وه، چې پکې د ننګرهار مرکزي لیسې لوبډلې بریا خپله کړه.

د ننګرهار مرکزي لیسې د ورزش برخې مسول عبدالرازاق ساپي یاران ته وویل، د کرکټ لوبې دغه سیالۍ یې د ښوونځیو د زده کونکو ترمنځ پیل کړې وې، چې پکې د بېلابېلو ښونځیو څخه زده کوونکو برخه اخیستې وه.

د نوموړي د معلوماتو له مخې، دغه سیالیو کې ۴ لوبډلې شاملې وې او د یوې اونۍ لپاره یې سیالیو دوام وکړ، چې په پای لوبې کې د معارف ستوري او معارف اکیډمي لوبډلې مخامخ شوې.

په وروستۍ لوبه کې د معارف اکیډمۍ لوبډلې مقابلې د معارف ستوري لوبډلې ته په ماتې ورکولو سره د دغه ټورنمنټ اتلولي خپله کړه.

د پای لوبې مراسمو کې د ننګرهار ولایت د ورزش امر ډاکټر منیر په خپلو خبرو کې وویل، هڅه کوي، چې په راتلونکې کې دغه سیالۍ ننګرهار ولایت د ټولو ښونځیو ترمنځ ترسره کړي، خو د نوموړي په وینا لا هم د ستونزو سره مخامخ دي او نه دي بریالي شوي چې د لوی ټورنمنټ په جوړلو سره بریالي شي.

ډاکټر منیر ویل، اوس مهال د ښونځیو زده کونکو لوبغاړو ته د لوازمو په ورکړې کې هم ستونزه لري او د نه شتون له کبله یې نور پروګرامونه هم ځنډیدلي دي.

همدا راز د ننګرهار مرکزي لیسې مدیر ملک شیر بهادر همت په خپلو خبرو کې وویل، له دې سیالیو څخه یې هدف د ښونځیو زده کوونکو ته د زدکړو ورکولو ترڅنګ د تفریح برابرول دي.

نوموړي وویل، ورزش د ښې روغتیا درلودلو لپاره اړین کار دی او زده کوونکي هم باید د خپلو زدکړو حاصلولو ترڅنګ ورزش ته هم د خپل صحت درلودلو لپاره پاملرنه وکړي.

په هغه هېوادونو کې چې کرکټ یې پیاوړی وي، د ښونځیو ترمنځ د کرکټ سیالیو ترسره کیدو ته زیاته پاملرنه کوي، ځکه چې د هغه هېواد د کرکټ ملي، الف، ۱۹ کلنې، ۱۷ کلنې او نورو بېلابېلو لوبډلو ته ترې ځوان لوبغاړي را پیدا کوي او کورنی کرکټ یې هم په همدغه ډول پیاوړی ثابتیږي.

د لیکوال/ لیکوالې په اړه

احسان الله ساپی