سپورټ نړیوال کرکټ

د هوا خراب حالت افغانستان او ایرلینډ له کلین سویپ څخه بچ کړل؛خو سیریز افغانستان وګټلو

د افغانستان او ایرلینډ د کرکټ ملي لوبډلو ترمنځ په دریمې ۲۰ اوریزه سیالۍ کې د باراني هوا خراب حالت د لوبې د لغوه کیدو لامل وګرځید.

افغان لوبډله یو بل کلین سویپ ته انتظار وه، خو د هوا حالت کوربه لوبډلې ایرلینډ سره مرسته وکړه او د دواړو کرکټ ملي لوبډلو ترمنځ سیالي لغوه اعلان شوه.

که څه هم دریمه ۲۰ اوریزه لوبه ترسره نشوه، خو افغان لوبډلې لا د وړاندې په دویمه سیالۍ کې سیریز کې ۲ د ۰ مقابل کې په خپلې ګټې را څرخولی و. 

د ایرلینډ په کوربه توب د افغانستان او ایرلینډ د کرکټ ملي لوبډلو ترمنځ د درې ۲۰ اوریزه او درې ۵۰ اوریزه سیالیو لړۍ پلان شوې ده، چې پکې افغان لوبډلې په لمړي سیریز یا د لوبو پرلپسې لړۍ کې ۲ د ۰ مقابل کې ایرلینډ ته ماتې ورکړې.

افغان لوبډلې په لمړۍ سیالۍ کې د ۱۶ او دویمه سیالۍ کې د ۸۱ منډو په توپیر سره بریاوې خپلې کړې.

په دې سیریز کې د افغانستان د کرکټ ملي لوبډلې لخوا حضرت الله ځاځی په توپ وهنه کې تر نورو لوبغاړو ښه وځلید او په دوه سیالیو کې د ۱۵۶ منډو په جوړلو سره هم د لوبو او هم د سیریز غوره لوبغاړی اعلان شو.

د درې سیالیو په دې سیریز کې د افغان بالرانو لخوا په توپ اچونه کې راشد خان ۷ او مجیب ځدران ۵ ویکټې ترلاسه کړې.

افغان کرکټ ملي لوبډلې په روان ۲۰۱۸ م کال کې لمړی د بنګله دیش کرکټ ملي لوبډلې ته کلین سویپ یا په درې پرلپسې ۲۰ اوریزه سیالیو ماتې ورکړې، خو ورپسې یې اوس ایرلینډۍ لوبډله په نظر کې وه، چې باراني هوا د ایرلینډ په ګټه تمامه شوه.

د دواړو افغانستان او ایرلینډ د کرکټ ملي لوبډلو ترمنځ د درې ۲۰ اوریزه سیالیو لړۍ پای ته ورسیده، خو د راتلونکې دوشنبې په روځ د درې ۵۰ اوریزه لوبو سیریز هم پیلېدونکی دی.

د یادونې وړ ده، چې افغان کرکټ ملي لوبډله به د ایرلینډ خلاف د درې ۵۰ اوریزه سیالیو د ترسره کیدو وروسته د اسیا جام ۵۰ اوریزه سیالیو ته د تیاریو په موخه متحده عربي اماراتو ته سفر وکړي.

د اسیا جام ۵۰ اوریزه سیالۍ د راتلونکې سیپټمبر میاشتې په ۱۵ مه نیټه د ۶ لوبډلو افغانستا، پاکستان، هندوستان، سریلنکا، بنګله دیش او یوه بله لوبډلې په ګډون سره پیل کیږي، چې لا تر دې مهاله شپږمه لوبډله نه ده په ډاګه شوې.

افغانستان د یو بل کلین سویپ په هڅه کې

د لیکوال/ لیکوالې په اړه

احسان الله ساپی