خواړه روغه سټه

څوهغه میوې او سبزۍ چې د مني فصل کې یې د ښې روغتیا لپاره کارولی شئ

لیکنه: بشر درویش

بشر دروېش

منی د هر موسم په شان د نورو ځانګړنو ترڅنګ خپلې خاصې مېوې هم لري.

په دې موسم کې د ډېرو تولیدیدونکو او هم ګټورو مېوو په اړه په دې مطلب کې معلومات درکوو.

د دې مېوو خوړل ځکه ضرور دي، چې له موسم سره برابره انرژي او نورې اړتیاوې مو پوره کوي.

مڼې

مڼې په ډېرو موسمونو کې پیدا کیږي، خو د مني مڼې بیا مختلف ډولونه او ځانګړی خوند لري.

دغه مېوه د فیبرونو او انتي اکسیدنونو له فوق العاده سرچینو څخه برخمنه ده.

په مڼو کې د کوئرستین په نوم یو ډول مواد شته، چې د حافظې په پیاوړتیا کې مهمه ونډه لري.

دغه مواد د عقلي زوال د مخنیوي ترڅنګ د یو شمېر نورو ناروغیو پرضد هم ګټور تمامیږي.

مڼې د هغه خوراکي رژیم یوه برخه هم ګڼل کیږي، چې د زړه د ناروغیو او سرطان په مخنیوي کې مهم رول لري.

مڼه هر وخت؛ په ځانګړي ډول په مني کې د غذایي رژیم یوه حاشیوي برخه مه ګڼئ.

تاسې کولای شئ، دغه مېوه له څو نورو سره په ګډه میده او د سهارنۍ په توګه استفاده ترې وکړئ.

سره چغندر

سره چغندر، چې پخې شوې بڼې ته یې لبلبو وېل کیږي، په مني کې له ډېرو پیدا کیدونکو مېوو څخه ده.

دغه مېوه د وینې جریان په پیاوړتیا او د بدن غړو ته د اکسیجن په ښه رسولوکې ونډه لري.

سره چغندر په خاصه توګه ورزشکارانو ته زیاته ګټه رسوي.

د څېړنو له مخې د سرو چغندرو د یوه ګیلاس اوبو څښل تر دوه اونیو د وینې فشار کنټرولوي.

د چغندر پاڼې هم د خوړلو دي. تاسې کولای شئ له سرو چغندرو څخه په سلادو کې هم ګټه واخلئ.

د چغندرو پخلي ته که وخت نه لرئ، خام یې هم خوړی شئ.

ټولو نه ښه طریقه دا ده، چې دغه مېوه خاش – خاش او بیا پخه کړئ. د دې ترڅنګ لږ تف هم ورکولای شئ څو د چپسو په حیث ګټه ترې واخلئ.

کرم

په مني کې کرم هم زیات تولیدیږي او موندل کیږي. کرم له هغو سبزیجاتو څخه دی، چې د پخولو ترڅنګ د سلاد په توګه هم کارول کیږي.

کرم د سرطان ضد خواص هم لري، په دغه سبزي یا سلاد کې پریمانه فایبر موجود دی.

په کرم کې ویټامین سي هم شته. دا د سلاد تر څنګ خوټولی هم شئ.

کدو

کدو له هغو سبزیجاتو څخه دی، چې پریمانه بتا کاروتن، پرو او ویټامین لري.

کدو په سړه هوا کې ډېره ګټه کوي.که یې د زیتون له تېلو سره پاخه کړئ، لا ډېره ګټه لري.

اینځر

که اینځر نه ځورئ سهوه کوئ. دا مېوه له پوتاشیم، کلسیم، اوسپنې او فایبرونو څخه جوړه شوې ده.

له دغې مېوې څخه په سلاد کې هم ګټه اخیستی شئ.

سره املوک

سره املوک پرېمانه ویټامین ای لري. په مني کې پرېمانه پیدا کیږي او خوړل یې ضرور دي.

هغه ښځې چې د امیدواره کیدو په تمه دي، د دې مېوې خوړل دې نه هېروي.

سره املوک د منګیزیم یوه ښه سرچینه هم ده، چې په دې ډول استرس او اظطراب کموي.

انار

انار له جذابو او زړه راښکونکو مېوو څخه ده. دا مېوه تر بل هر وخت په مني کې ډېر پیدا کیږي.

انار د پوتاشیم یوه ښه سرچینه ده. دا مېوه نور ګټور مواد هم لري.

انار د زیاتوالي له کبله په مني کې ارزانه هم وي. د دانو د خوراک ترڅنګ یې له جوسه هم ګټه اخیستی شئ.

د لیکوال/ لیکوالې په اړه

بشر درویش

بشر درویش د یاران د کاري ټیم غړی دی، چې پر بیلابیلو مسلو د یاران لپاره راپورونه او مطالب چمتو کوي