سپورټ نړیوال کرکټ

انګلستان يوځل بيا پاکستان ته ماته ورکړه.

لیکنه: مدثر دعوت
اعلان

ليکنه: مدثر دعوت

د انګلستان او پاکستان ترمنځ په دريمه يو ورځنۍ لوبه کي دواړو لوبډلو ډیر غوره کريکټ ننداري ته وړاندي کړ.

انګلستان وکولای سول چي يو ډير قوي هدف مات کړي او لوبه يې وګټله.

د لوبي پچه انګلينډ وګټله او پاکستان ته يې د توپوهني بلنه ورکړه.

د پاکستان لپاره پيلوونکی لوبغاړی فخرزمان که څه هم په ۲ منډو وسوځيدی خو بل ملګري امام الحق بيا په ۱۳۱ توپونو ۱۵۱ منډي وکړې.

بابر اعظم ۱۵، حارث سوهيل ۴۱،سرفراز ۲۷،اصف علي ۵۲ او عماد وصيم ۲۲ منډي وکړې.

د انګلستان لپاره ويلي او پلکنيټ يوه يوه ويکټه،خو ټام کرن ۲ او کريس واکس ۴ ويکټي ترلاسه کړې.

پاکستان په پوره ۵۰ اوورونو کي د ۹ لوبغاړو په سوځيدو انګلستان ته ۳۵۹ منډي هدف ورکړ.

د انګلستان توپوهنه چي په نړيواله کچه يومثال دی يوځل بيايې خپل زور پاکستاني توپ اچوونکو ته وروښودی.

د انګلستان اوپنرانو ډير غوره او مسلکي پيل وکړ،د دواړو اوپنرانو غوري توپوهني راتلونکو توپوهونکو ته لوبه ډيره اسانه کړه.

جيسن رای په ۵۵ توپونو ۷۶ او جوني بيرسټو بيا په ۹۳ توپونو ۱۲۸ منډي وکړې.

جوی روټ په ۳۶ توپونو ۴۳ او بین سټوکس په ۳۸ توپونو ۳۷ منډي وکړې.

د پاکستان لپاره جنيدخان، اماد وصيم او فهيم اشرف يوه يوه ويکټه ترلاسه کړه.

انګلستان په ۴۵م اوور کي د پاکستان هدف ته ځان ورسوی او په ۶ ويکټو يې لوبه وګټله.

جوني بيرسټو چي په ۹۳ توپونو ۱۲۸ منډي کړي وې د لوبي د غوره لوبغاړي جائزه وګټله.

هيره دي نه وي چي د ۵ يو ورځنيو لوبو د سيريز لومړنۍ لوبه د باران له کبله بې نتيجې پايته رسيدلې وه خو وروستۍ دواړي لوبي انګلستان وګټلې.

د لیکوال/ لیکوالې په اړه

مدثر دعوت

مدثر دعوت هلمند میشتی ژورنالیست دی. د یاران لپاره په سپورټي او نورو برخو کې لیکنې کوي. په یاران کې د ښاغلي دعوت د لیکنو د بیا خپراوی حق له یاران سره خوندي دی.