لوبې

افغان ۱۹ کلنو د اسیا جام غچ په نړیوال جام کې واخیست !

د افغانستان د کرکټ ۱۹ کلنو ملي لوبډلې د کرکټ په نړیوال جام سیالیو کې د پاکستان وروسته په خپلې دویمې سیالۍ کې د سریلنکا لوبډلې ته هم ماتې ورکړې.
په دې سره افغان لوبډلې د سریلنکا لوبډلې څخه د تیر اسیايي جام سیالیو هغه غچ هم واخیست، چې د راونډ په دویمه سیالۍ کې افغان لوبډلې ته ماتې ورکړې وه.
د کرکټ نړیوالې شورا لخوا د ۲۰۱۷ م کال د ۱۹ کلنو ځوانانو د کرکټ اسیايي جام سیالیو کې د ګډون پر مهال افغان لوبډلې خپلو ټولو سیالانو ته ماتې ورکړې وې، خو په لمړي راونډ کې يې د سریلنکا څخه خپله ماتې خوړلې وه.
د ۲۰۱۸ م کال د کرکټ نړیوال جام سیالیو په مهالویش کې بیا هم افغانستان د پاکستان، سریلنکا او ایرلینډ سره په یو ګروپ کې ځای لري، چې په خپلو دوه لمړیو سیالیو کې پاکستان او سریلنکا ته ماتې ورکړې.


د افغانستان د ۱۹ کلنو د کرکټ ملي لوبډلې په دې بریا سره د کرکټ نړیوال جام بل پړاو کوارټر فاینل ته لار پیدا کړه، خو له هغې وړاندې به د راتلونکې شنبې په ورځ د ایرلینډ خلاف خپله وروستۍ سیالي ترسره کړي.
د کرکټ ۱۹ کلنو ځوانانو د نړیوال جام سیالیو ۱۲ م پړاو د ۱۶ لوبډلو په ګډون د نیوزیلنیډ په کوربه توب سره پیل شوی دی، چې پکې افغان لوبډله د بل هر ځل په نسبت دا ځل ښه ځلیدونکې او نورو لوبډلو ته د یو ټارګیټ یا هدف په نښه شوي لوبډلې په توګه ګرځیدلې ده.

له فیسبوک تبصرې

تبصرې

د لیکوال/ لیکوالې په اړه

احسان الله ساپی