سپورټ

افغان لوبډلې ویسټ انډیز ته په ماتې ورکولو نړیوال جام ته د ورتګ هیلې ژوندۍ وساتلې

د ۲۰۱۹ م کال د انګلستان په کوربه توب د کرکټ نړیوال جام ۵۰ اوریزه سیالیو ته د لار موندنې په موخه د افغانستان د کرکټ ملي لوبډلې د سوپر سیکس پړاو په لمړۍ لوبه کې د ټومنټ تر ټولو پیاوړې لوبډلې ویسټ انډیز د کرکټ ملي لوبډلې ته ماتې ورکړه او لا یې د مخکې تګ هیلې ځان سره وساتلې.

د کرکټ نړیوال جام ۵۰ اوریزه سیالیو ته د لار موندنې په موخه د سوپر سیکس یا د ۶ بهترینه لوبډلو په مرحله کې داوړه افغانستان او ویسټ انډیز سره مخامخ وو، چې په سیالۍ کې ویسټ انډیزۍ لوبډلې د خپلو ۸ لوبغاړو په سوځیدو سره ټولې ۱۹۷ منډې جوړې کړې او افغان لوبډلې ته یې د ۱۹۸ منډو هدف وټاکلو.

په ځوابي لوبه کې د افغانستان د کرکټ ملي لوبډلې د رحمت شاه زرمتي د ۶۸ او محمد نبي د ۳۱ زیاتو منډو جوړلو سره دغه هدف د لوبې په ۴۸ م اور کې پوره کړ او ویسټ انډیز ته یې د ۳ ویکټو په توپیر سره ماتې ورکړه.

په روان ټورنمنټ کې له دې وړاندې هم افغان لوبډلې په تمریناتي سیالۍ کې ویسټ انډیز ته ماتې ورکړې وه.

په ننۍ لوبه کې ځوان مجیب ځدران د ویسټ انډیزۍ لوبډلې ۳ لوبغاړي وسوځول او د ښې لوبې د ترسره کولو سره د لوبې غوره لوبغاړی وټاکل شو.

افغان لوبډلې په دې بریا سره ۲ پواینټونه ترلاسه کړل، خو که په راتلونکو دوه لوبو کې هم د ایرلینډ او متحده عربي اماراتو لوبډلې ته ماتې ورکړي، نو ټول به ۶ پواینټونه ترلاسه کړي، چې بیا یې د ۲۰۱۹ م کال د کرکټ نړیوال جام سیالیو ته ورتګ اسانه کیدای شي.

د غوراوي پړاو سیالیو په لمړي پړاو کې د ګډون کوونکو ۱۰ لوبډلو څخه د افغانستان ترڅنګ ویسټ انډیز، زیمبابوې، ایرلینډ، سکاټلینډ او متحده عربي اماراتو لوبډله د سوپر سیکس مرحلې ته ورسیدې، خو د هالینډ ترڅنګ د هانګ کانګ، نیپال او پي این جي لوبډلې د سیالیو د بایللو له کبله د مخکې تګ څخه بې برخې شوې.

د ۲۰۱۹ م کال د کرکټ نړیوال جام سیالۍ د ۱۰ لوبډلو ګډون په انګلستان کې ترسره کیږي، چې پکې اسټرالیا، هندوستان، انګلستان، جنوبي افریقا، نیوزیلینډ، سریلنکا، پاکستان او د بنګله دیش لوبډلې لا د وړاندې شتون لري.

 

د لیکوال/ لیکوالې په اړه

احسان الله ساپی