لوبې

افغانستان په دویمې ماتې خپل مخکې تګ ستونزمن کړ

د افغانستان د کرکټ ملي لوبډلې د زیمبابوې په کوربه توب د ۲۰۱۸ م کال د کرکټ نړیوال جام غوراوي پړاو سیالو کې د سکاټلینډ خلاف د لمړۍ ماتې وروسته په دویمه لوبه کې کوربه زیمبابوې لوبډلې ته هم ماتې وخوړه.

د کرکټ نړیوال جام غوراوي پړاو سیالیو کې افغان لوبډله په خپلې دویمې سیالۍ کې د زیمبابوې سره په سیالۍ کې مخ وه، چې پکې د زیمبابوې لوبډلې په لمړۍ توپ وهنې د برینډن ټایلر د ۸۹ او سکندر رضا د ۶۰ منډو جوړلو سره افغان لوبډلې ته د ۱۹۷ منډو هدف وټاکه.

افغان لوبډلې یو ځل بیا ښه پیل نه درلود او خپل دوه لوبغاړي احسان الله جنت او ناصر جمال یې ژر د لاسه ورکړل، خو رحمت شاه زرمتي د محمد نبي عیسی خیل سره په یوې ښې ملګرتیا سره افغان لوبډلې ته تر یو وخت د بریا تمه ورکړې وه، چې د دواړو د ویکټو په سوځیدو سره د افغان لوبډلې د ویکټو زوال شروع شو.

 تیزو بالرانو دولت ځدران او شاپور ځدران افغان لوبډلې ته تر وروستیو شیبو پورې د بریا تمه ورکړې وه، خو په وروستي اور کې یې ویکټ وبایله او افغان لوبډلې د زیمبابوې څخه د ۲ منډو په توپیر سره ماتې وخوړه.

 په دې ماتې سره افغان لوبډلې د کرکټ نړیوال جام د غوراوي پړاو سیالیو کې خپل مخکې تګ ستونزمن کړ.

که افغان لوبډله په راتلونکو دوه سیالیو کې د هانګ کانګ او نیپال لوبډلو خلاف په لوړ اوسط سره ماتې ورکړي، نو دویم پړاو ته تګ به یې اسانه شي، خو د ۲۰۱۹ م کال د کرکټ نړیوال جام سیالیو ته یې ورتګ سر له اوسه ستونزمن ښکاري.

د کرکټ نړیوال جام غوراوي پړوا سیالیو په روان بهیر کې د لمړي ګروپ څخه ایرلینډ او ویسټ انډیز او دویم ګروپ څخه سکاټلینډ او زیمبابوې دویم پړاو ته خپل تګ اسانه کړ او د ګروپ سر کې قرار لري.

 د افغانستان د کرکټ ملي لوبډله به په خپلې راتلونکې سیالۍ کې د راتلونکې پنجشنبې په ورځ د هانګ کانګ سره د لوبې ډګر ته ووځي.

له فیسبوک تبصرې

تبصرې

د لیکوال/ لیکوالې په اړه

احسان الله ساپی