سپورټ کورنی کرکټ نړیوال کرکټ

افغانستان او ایرلنډ نن ۲۰ اوریزه لوبه لري؛ دا لوبه ۱۵۰ هیوادونو کې په تلویزونونو خپریږي

د افغانستان د کرکټ ملي لوبډله د ایرلینډ خلاف د ۶ لوبو سلسله پیلوي، چې نن په لمړۍ ۲۰ اوریزه سیالۍ سره پیل کیږي.

د دواړو کرکټ ملي لوبډلو ترمنځ د درې ۲۰ اوریزه او درې ۵۰ اوریزه لوبو سیریزونه پلان شوي دي، چې په ایرلینډ کې ترسره کیږي.

د افغانستان د کرکټ ملي لوبډله د ایرلینډ خلاف دغه سیالیو ته د لا ښه چمتوالي او تمریناتو په موخه لمړی انګلستان ته تللې وه، خو اوس ایرلینډ ته رسیدلې ده. 

په روان ۲۰۱۸ م کال کې د افغانستان کرکټ بورډ د کوربه توب وروسته ایرلینډ هم د افغان لوبډلې میلمه پالنې ته را مخکې شو او روانه اګسټ میاشت یې د لوبو د ترسره کولو لپاره کره نیټه وټاکله، چې سر له نن څخه پیل کیږي او د همدې میاشتې تر وروستۍ ۳۱ مې نیټې پوره دغه لړۍ دوام وکړي. 

افغان لوبغاړي د چمتوالي پرمهال

د مهالویش له مخې د ۶ لوبو دغه سلسله به نن شپه په لمړۍ ۲۰ اوریزه سیالۍ سره پیل شي، چې په ژوندۍ بڼه به هم وښودل شي.

د ایرلینډ کرکټ بورډ د معلوماتو له مخې دغه لوبه به د ایرلینډ ترڅنګ د اسټرالیا، نیوزیلنډ او انګلستان تلویزیوني شبکو لخوا په ۱۵۰ هېوادونو کې نشر شي.

د دغه کرکټ بورډ د خبر پاڼې له مخې تر دې مهاله یې په افغانستان کې د کوم تلویزیون سره قرار داد نه دی لاسلیک کړی، خو نن یې معلومات وشي. 

دا چې د یو هېواد کوربه توب پورې د لوبې ژوندی بهیر اړه لري، نو ځکه تر دې مهاله افغان کرکټ بورډ هم چپه خوله دی.

د یادونې وړ ده، چې د لمړۍ۲۰ اوریزه سیالۍ وروسته به د اګسټ میاشتې په ۲۲ مه نیټه دویمه او په ۲۴ مه نیټه وروستۍ دریمه ۲۰ اوریزه سیالي ترسره شي.

همدا راز د درې ۵۰ اوریزه سیالیو لمړۍ لوبه به د اګسټ میاشتې په ۲۷ مه، دویمه په ۲۹ مه او وروستۍ لوبه به د همدغه میاشتې په ۳۱ مې نیټې سره ترسره شي.

د لیکوال/ لیکوالې په اړه

احسان الله ساپی